Praz vajnu ŭ Iranie mocna ŭźlacieli ceny na fistaški

Košt fistašak na suśvietnym rynku rezka vyras z-za vajennych padziej na Blizkim Uschodzie, jakija parušyli pastaŭki i ekspart ź Irana — adnaho z hałoŭnych pastaŭščykoŭ hetych arechaŭ, piša Bloomberg sa spasyłkaj na analityčnuju kampaniju Expana Markets.

Zdymak ilustracyjny. Fota: freepik.com

Iran zabiaśpiečvaje kala 30% suśvietnaha ekspartu fistašak, tamu lubyja prablemy ŭ rehijonie mocna ŭpłyvajuć na hety rynak.

Praz vajenny kanflikt uźnikli pieraboi z pastaŭkami ŭhnajeńniaŭ u krainu, a taksama składanaści z vyvazam pradukcyi. U vyniku ceny dasiahnuli maksimumu za apošnija vosiem hadoŭ — kala 4,57 dalara za funt (454 h).

Akramia hetaha, z-za niestabilnaści ŭ rehijonie transpartnyja kampanii pačali admaŭlacca ad novych pieravozak u napramku Blizkaha Uschodu. Heta ŭžo zakranuła pastaŭki ŭ Indyju i maršruty praz Abjadnanyja Arabskija Emiraty i Turcyju.

Analityki adznačajuć, što na fonie hetych prablem uzmacniajecca deficyt fistašak, što jašče bolš pavyšaje kankurencyju i šturchaje ceny ŭvierch.

Pry hetym deficyt na rynku naziraŭsia i raniej — jašče ŭ 2025 hodzie. Tady popyt na fistaški značna vyras, u tym liku z-za papularnaści roznych praduktaŭ, naprykład dubajskaha šakaładu, dzie jany šyroka vykarystoŭvajucca.

Kamientary da artykuła