Dźvie dziaŭčyny z kavunovaha bataljona Łukašenki zapuścili svoj brend adzieńnia. Zdajecca, nie ŭ Biełarusi
Pradavać sukienački dla dziaŭčat 90-60‑90 płanujuć pa ŭsioj Rasii.
Darja Hančarevič i Jana Baranoŭskaja. Fota: wuwi.ru
Pra heta ŭ svaich sacsietkach raspaviała Jana Baranoŭskaja. Jana ŭdzielničała ŭ konkursie «Mis Biełaruś» u 2021 hodzie — i stała štatnaj pryhažuniaj Łukašenki.
Dziaŭčyna naviedvaje jaho bali, zaŭzieje za palityka na chakiei, a jašče padnosić jamu kvietki. Pryhažunia rehularna ŭdzielničaje ŭ mierapryjemstvach razam z Łukašenkam.
Letaś joj zrabiŭ prapanovu ruki i serca Vital Astroŭski. Amal vosiem hadoŭ jon adpracavaŭ u Nacyjanalnym alimpijskim kamitecie Biełarusi, ale ŭ 2025 hodzie źmianiŭ miesca pracy — pajšoŭ u budaŭničuju kampaniju «Dana Astra». Sychodziačy z NAK, zrabiŭ u instahramie dopis, u jakim asabista padziakavaŭ Viktaru Łukašenku.
Apošnim časam Baranoŭskaja časta publikuje fotazdymki z Maskvy. A ŭčora jana raspaviała ŭ Threads, što razam ź siabroŭkaj stvaryła svoj brend adzieńnia — wuwi.wear.
Taja samaja siabroŭka — heta «Mis Biełaruś — 2021» Darja Hančarevič. Jana pracuje ŭ Nacyjanalnaj škole pryhažości i taksama pieryjadyčna ŭdzielničaje ŭ mierapryjemstvach z Łukašenkam.
Imavierna, aryjentujucca pryhažuni vyklučna na Rasiju: u instahramie ich brendu paznačana, što mienavita pa hetaj krainie mahčyma zamović dastaŭku.
Nielha skazać, što stvaryli jany niešta aryhinalnaje. Prynamsi asnova pieršaj kalekcyi — seksualnyja viačernija sukienki, jakija raźličany vyklučna na dziaŭčat z madelnymi paramietrami.
Paznačana, što ŭ prodažy taksama budzie chatniaje adzieńnie dy dziełavyja kaściumy. Taksama mahčymy pašyŭ pa indyvidualnaj zamovie.
Tyja sukienki, jakija ŭžo jość na sajcie, u ekvivalencie kaštujuć pryblizna 670‑935 rubloŭ.
Fota z sajta wuwi.ru
Baranoŭskaja ŭ Threads prosić padtrymać ich ź siabroŭkaj. A sama pakul sprabuje prasoŭvać brend u Rasii praź jakich-nijakich viadomych ludziej. U instahramie Wuwi niekalki dopisaŭ pryśviečana tamu, što ŭ ich vobrazie na premjeru druhoha siezonu sieryjała «Lichije» pryjšła rasijskaja aktrysa Palina Maksimava.
Aktrysa z zadavalnieńniem paziravała dla ahulnych fota i videa z Baranoŭskaj i jaje kachanym Vitalom Astroŭskim.
Vital Astroŭski, Palina Maksimava i Jana Baranoŭskaja
Čytajcie taksama:
Dziaŭčyna z «kavunovaha bataljona» Łukašenki atrymała ŭ Rymie prapanovu ruki i serca. Chto ž žanich?
«Mis Biełaruś» usio bolš nahadvaje konkurs pryhažości ŭ haremie
Dzie tusić łukašenkaŭskaja moładź? Pje ŭ «Lebiadzinym», adpačyvaje ŭ Paryžy i Miłanie