U Biełastoku projdzie prezientacyja daśledavańnia pra kiryličnyja vydańni VKŁ

17 krasavika ŭ Biełastoku projdzie prezientacyja biełaruskaha pierakładu daśledavańnia «Kiryličnyja vydańni vydaviectvaŭ ź Vialikaha Kniastva Litoŭskaha ŭ XVI-XVIII st.» z udziełam jaho aŭtarki Zoi Pierasłaŭcaŭ-Jaraševič.

Chto aŭtar?

Zoja Pierasłaŭcaŭ-Jaraševič — polski historyk, śpiecyjalizujecca na historyi Vialikaha Kniastva Litoŭskaha. Šmat hadoŭ zajmała pasadu dyrektara Instytuta historyi i mižnarodnych adnosin Varminska-Mazurskaha ŭniviersiteta ŭ Olštynie. Kniha, čyj biełaruski pierakład budzie priezientavany, pabačyła śviet u vydaviectvie hetaha ŭniviersiteta 

Pra što hetaja kniha?

Heta samaje hruntoŭnaje na hety momant navukovaje daśledavańnie, pryśviečanaje kniham na starabiełaruskaj i carkoŭnasłavianskaj movach, vydadzienym na našych ziemlach da ich inkarparacyi u skład Rasijskaj Impieryi.

U knizie raskryvajecca historyja Vialikaha Kniastva Litoŭskaha ź niečakanaha boku. U masavaj śviadomaści funkcyjanujuć ujaŭleńni tolki pra niekalkich vybitnych biełaruskich knihadrukaroŭ časoŭ VKŁ — jak praviła, Francyska Skaryny i Symona Budnaha. U daśledavańni raskryvajecca ŭsia paŭnata knihavydavieckaj dziejnaści ŭ VKŁ — ź niabytu viartajucca dziasiatki knihadrukaroŭ, razhladajecca pradukcyja dziasiatkaŭ vydaviectvaŭ, čyja dziejnaść mieła biassprečny kulturny efiekt. Za try stahodździ biełaruskija drukarni ŭ VKŁ vydali kala 380 vydańniaŭ, čyj sukupny abjom skłaŭ bolš za 22,55 tysiačy arkušaŭ.

Z knihi možna daviedacca:

• kolki ŭ VKŁ dziejničała drukarniaŭ, jakija vypuskali knihi na starabiełaruskaj movie, a taksama ŭ jakich haradach i miastečkach jany byli;
• jakija byli tyražy i repiertuar hetych vydańniaŭ; 
• jakija drukarni dziejničali najdaŭžej;
• jakija drukarni viali rej z punktu hledžańnia abjomaŭ knižnaj pradukcyi. Jakaja była kolkaść u cełym;
• što možna skazać pra źmiest vydadzienych knih, ich žanry i funkcyjanalnyja typy;
• čym admietny byŭ hrafičny bok drukaŭ, farmaty vydańniaŭ, ich dyzajn (pryjomy numaracyi staronak, styli šryftu i technika naboru, vykarystańnie zastavak i kancovak, inicyjałaŭ, ramak na marhinesach, tytulnych arkušaŭ, ilustracyj). 

Data praviadzieńnia prezientacyi: 17 krasavika 2026 hoda (piatnica), 18:00—20:00 (CET).

Biełaruski chab «Novaja Ziamla» (Białystok, ul. św. Rocha 5/32). 

Prezentacyja pravodzicca pry padtrymcy prahramy Jeŭrapiejskaha sajuza 'EU4Belarus: Support to Advanced Learning and Training (SALT II).

Kamientary da artykuła