U minski ofis architekturnaj studyi ZROBIM architects pryjšli siłaviki
Ranicaj 9 krasavika siłaviki pryjšli ŭ minski ofis viadomaj architekturnaj kampanii ZROBIM architects. Pavodle infarmacyi vydańnia «Lusterka» ad dźviuch nie źviazanych pamiž saboj krynic, zatrymanyja ŭsie supracoŭniki, jakija znachodzilisia na miescy, — heta kala 50 čałaviek. Pryčyna cikavaści siłavikoŭ da kampanii pakul nieviadomaja.
Zasnavalniki ZROBIM architects Alaksiej Karabloŭ (źleva) i Andrej Makoŭski (Andruś Bezdar). Fota: probusiness.io
Jak paviedamili «Lusterku» jaho krynicy, siłaviki pryjšli ŭ ofis ZROBIM architects, raźmieščany ŭ Minsku, siońnia, 9 krasavika, kala 11‑j hadziny ranicy.
Pavodle najaŭnaj infarmacyi, byli zatrymanyja ŭsie supracoŭniki, jakija ŭ toj momant znachodzilisia na rabočych miescach. Havorka idzie prykładna pra 50 čałaviek. Siarod zatrymanych nibyta i suzasnavalnik — Andrej Makoŭski.
Taksama, jak paviedamlajuć krynicy «Lusterka», na hety momant niedastupny pracoŭny siervier kampanii, praź jaki ŭ tym liku rabotniki pracujuć dystancyjna.
Pryčyny cikavaści siłavikoŭ da adnoj z samych viadomych i paśpiachovych architekturnych studyj Biełarusi na hety momant nieviadomyja.
ZROBIM architects — biełaruskaja architekturnaja studyja, zasnavanaja ŭ 2011 hodzie Andrejem Makoŭskim (Andruś Bezdar) i Alaksiejem Karablovym. Kampanija viadomaja svaimi prajektami ŭ sučasnaj architektury i dyzajnie, pracuje jak u Biełarusi, tak i za miažoj.
Studyja aktyŭna viadzie svaje sacyjalnyja sietki i błoh, dzie dzielicca novymi prajektami i navinami. Kampanija rehularna atrymlivaje prestyžnyja mižnarodnyja ŭznaharody. Tak, u minułym hodzie ich prajekt škoły ŭ staličnym mikrarajonie Novaja Baravaja staŭ pieramožcam IIDA Global Excellence Award 2025 u katehoryi «Adukacyja».
Čytajcie taksama:
Ryta Dakota ŭpieršyniu raspaviała, za što biełaruskija siłaviki schapili jaje maci ŭ 2022 hodzie