U Minsku aciapleńnie pieraviali ŭ «samy ekanomny režym»
U Minsku zamiest poŭnaha adklučeńnia aciapleńnia ŭ pieryjad paciapleńnia vyrašyli pieravieści sistemu ŭ «samy ekanomny režym». Pra heta paviedamiła arhanizacyja «Minskenierha».
Zdymak ilustracyjny. Fota: «Naša Niva»
Z-za ciopłaha nadvorja ŭ batarei ciapier padajecca ciepłanośbit ź minimalna mahčymaj tempieraturaj i źnižanaj cyrkulacyjaj. U arhanizacyi adznačyli, što tempieratura vady ŭ sistemie kala 70 hradusaŭ — heta samaja nižniaja miaža, jakaja dazvalaje padtrymlivać narmalny ŭzrovień nahrevu.
Śpiecyjalisty tłumačać, što ŭ mižsiezońnie składana rehulavać tempieraturu aciapleńnia: nočču jašče choładna, a ŭdzień — značna ciaplej. Dadatkova ŭpłyvaje i raźmiaščeńnie budynkaŭ: u pamiaškańniach, jakija vychodziać na soniečny bok, moža być navat zanadta horača.
U niekatorych rehijonach Biełarusi ŭžo pačali adklučać aciapleńnie, ale ŭ stalicy pakul vyrašyli dziejničać bolš aściarožna.
Zvyčajna poŭnaje zaviaršeńnie aciaplalnaha siezona adbyvajecca pa rašeńni haradskich uładaŭ. Aciapleńnie ŭ sacyjalnych ustanovach adklučajuć, kali tempieratura trymajecca vyšej za +10°C na praciahu troch sutak, a ŭ žyłych damach — kali stabilna trymajecca vyšej za +8°C.
Čytajcie taksama:
Na Homielščynie ŭžo pačali adklučać aciapleńnie — pieršymi ŭ krainie