«Jon da hetaha času prychodzić u siabie paśla ŭdaru ŭ skivicu». Tramp vyśmiajaŭ Makrona i jaho žonku na fonie novaj ataki na NATA
Donald Tramp publična prajšoŭsia pa Emanuelu Makronie i jaho žoncy Bryžyt Makron padčas pryvatnaha abiedu, jaki adbyŭsia napiaredadni.
Emanuel Makron i Donald Tramp u Vašynhtonie ŭ žniŭni 2025 hoda. Fota: Win McNamee/Getty Images
«Ja telefanuju ŭ Francyju, Makronu, ź jakim jaho žonka abychodzicca žudasna. Jon da hetaha času sprabuje akryjać paśla ŭdaru ŭ skivicu», — cytujuć amierykanskaha prezidenta Reuters i Le Monde.
Havorka išła pra videa 2025 hoda z Vjetnama, jakoje Makron paźniej nazyvaŭ častkaj dezinfarmacyjnaj kampanii.
Tady padčas spusku pa trapie kamiera zafiksavała niečakany momant pamiž Emanuelem Makronam i jaho žonkaj. Bryžyt Makron rezka dakranułasia da tvaru prezidenta Francyi Emanuela Makrona na borcie samalota, jaki pryziamliŭsia ŭ aeraporcie Chanoja 25 maja.
Žest pieršaj łedzi, što vyklikaŭ roznyja interpretacyi, imhnienna raspaŭsiudziŭsia ŭ sacsietkach i staŭ abjektam śpiekulacyj.
Zapis sa słovami Trampa nienadoŭha źjaviŭsia na YouTube-kanale Biełaha doma, paśla čaho dostup da jaho byŭ zakryty.
Dalej Tramp źviazaŭ naśmieški nad Makronam z pretenzijami da sajuźnikaŭ pa aljansie, piša Bild.
Pavodle Reuters i AP, jon znoŭ nazvaŭ NATA «papiarovym tyhram» i zajaviŭ, što surjozna razhladaje vychad ZŠA z aljansu paśla admovy jeŭrapiejskich krain padtrymlivać amierykanskuju kampaniju suprać Irana. Dziaržaŭny sakratar Marko Rubia taksama kazaŭ, što paśla vajny Vašynhtonu pryjdziecca pierahledzieć staŭleńnie da NATA.
U Jeŭropie hetyja zajavy ŭžo vyklikali tryvohu. AP paviedamlaje, što hiensiek NATA Mark Rute źbirajecca ŭ Vašynhton, kab pasprabavać źnizić napružanaść u adnosinach z ZŠA.