«Hniuś panuje nad krajem». Uładzimir Niaklajeŭ pryśviaciŭ vierš Kaciarynie Andrejevaj
Paet u svaim fejsbuku apublikavaŭ vierš, pryśviaciŭšy žurnalistcy «Biełsata», što vyjšła na volu ŭ hety čaćvier.
Hniuś panuje nad krajem. Što ž musić
Z našym krajem zrabić heta hniuś?
Nie pakinuć žyvoj Biełarusi,
A źmiartvić, źniežyvić Biełaruś!
I źmiarćvieła b, być moža, kraina,
Nie žyvy nie stryvała b ciažar,
Kab nie ŭśmieška tvaja, Kaciaryna,
Nie biblejski — za kratami! — tvar.
Kab nie vočy, što navat u bolu,
U hłyboka schavanych ślazach
Hetak poŭniacca viečnaj luboŭju,
Byccam śvieciacca na abrazach.
Kaciarynu Andrejevu aryštavali ŭ listapadzie 2020 hoda. Jana nie viarnułasia dadomu z Płoščy Pieramienaŭ, adkul viała dla «Biełsata» žyvy efir. Andrejevu i apieratarku Darju Čulcovu puścili da siabie na bałkon žychary doma, adnak siłaviki ŭziali šturmam kvateru. Na dziaŭčat zaviali kryminalnuju spravu i prysudzili pa 2 hady źniavoleńnia za «ŭdzieł» u pratestach.
Adnak kali Darja Čulcova vyjšła pa skančeńni terminu, to na Kaciarynu Andrejevu zaviali novuju kryminałku — za «zdradu dziaržavie». Ahułam žurnalistka atrymała 8 hadoŭ i 3 miesiacy źniavoleńnia.