Ukraina prapanoŭvała ZŠA technałohii procidziejańnia iranskim bieśpiłotnikam. Tyja nie zacikavilisia, ciapier ličać heta «najbolšym promacham»

Kala siami miesiacaŭ tamu ŭkrainskija ŭłady prapanoŭvali Złučanym Štatam svaje pravieranyja ŭ bajach technałohii dla źniščeńnia iranskich dronaŭ-kamikadze. Adnak Bieły dom, jak paviedamlaje Axios, tady admachnuŭsia: «Heta Zialenski ŭ svaim styli».

Uładzimir Zialenski i dron-kamikadze «Šachied». Fota Ofisa prezidenta Ukrainy

Padčas zakrytaj sustrečy ŭ Biełym domie 18 žniŭnia minułaha hoda prezident Ukrainy Uładzimir Zialenski prapanavaŭ prezidentu Trampu bieśpiłotniki-pierachopniki. Heta razhladałasia jak sposab umacavać suviazi i, pavodle słoŭ adnaho z čynoŭnikaŭ, vykazać padziaku za padtrymku ZŠA ŭ zmahańni z rasijskaj ahresijaj.

Jak śćviardžaje Axios, ukrainski bok navat padrychtavaŭ prezientacyju ŭ PowerPoint dla amierykanskich čynoŭnikaŭ, na jakoj była pakazanaja karta Blizkaha Uschodu i źmieščana praročaje papiaredžańnie: «Iran udaskanalvaje kanstrukcyju svajho bieśpiłotnika-kamikadze «Šachied».

U prezientacyi prapanoŭvałasia ideja stvareńnia «vuzłoŭ baraćby ź bieśpiłotnikami» ŭ Turcyi, Iardanii i dziaržavach Piersidskaha zaliva, dzie raźmieščanyja bazy ZŠA, kab supraćstajać pahrozie z boku Irana i jaho pamahatych.

«My chacieli pabudavać «ścieny z dronaŭ» i ŭsio nieabchodnaje, naprykład, radary i hetak dalej», — cytuje vydańnie słovy nienazvanaha ŭkrainskaha čynoŭnika.

Ukrainski bok padyšoŭ da prapanovy prahmatyčna, aformiŭšy jaje jak biznes-partniorstva va ŭlubionym Trampu styli the art of the deal: Ukraina daje nou-chau i stvaraje pracoŭnyja miescy ŭ ZŠA. U prezientacyi adznačałasia, što Kijeŭ moža dapamahčy stvaryć da 20 miljonaŭ adzinak zbroi, kab zabiaśpiečyć amierykanskaje daminavańnie ŭ śfiery bieśpiłotnikaŭ.

Donald Tramp i Uładzimir Zialenski. 18 žniŭnia 2025 hoda. Fota: Alex Wong / Getty Images

U abmien na nadańnie ZŠA dostupu da svajoj vytvorčaści dronaŭ i sistem baraćby ź imi, a taksama da nou-chau, Ukraina prasiła mahčymaść kuplać amierykanskuju zbroju.

«Naša prablema — u abarotnym kapitale. Našy resursy dazvalali nam vyrablać tolki 50% ad taho, što my možam. Tamu my chacieli, kab ZŠA inviestavali astatnija 50% i mieli dolu ŭ vytvorčaści», — adznačyŭ ukrainski čynoŭnik i dadaŭ:

«Na toj sustrečy… u žniŭni Tramp paprasiŭ svaju kamandu papracavać nad hetym, ale heta ničym nie skončyłasia».

Amierykanski čynoŭnik, jaki bačyŭ prezientacyju, paćvierdziŭ vydańniu, što kamanda Zialenskaha pakazvała jaje administracyi. Pavodle jaho słoŭ, niekatoryja ŭ administracyi Trampa skieptyčna pastavilisia da Zialenskaha, ličačy jaho praźmiernym «samapijarščykam» z krainy-satelita, jakaja nie karystajecca dastatkovaj pavahaj u Vašynhtonie.

«My padumali, što heta Zialenski ŭ svaim styli. Niechta vyrašyŭ nie kuplacca na heta», — skazaŭ čynoŭnik.

U minuły čaćvier ZŠA aficyjna źviarnulisia da Zialenskaha pa dapamohu ŭ baraćbie z dronami, paviedamlaje The New York Times. A ŭ piatnicu ZŠA abviaścili pra płany razhortvańnia ŭłasnaj supraćdronavaj sistemy Merops na fonie narakańniaŭ arabskich sajuźnikaŭ ZŠA na ataki dronaŭ.

Vydańnie zaŭvažaje, što adzin z čynoŭnikaŭ nazvaŭ amierykanski adkaz na iranskija drony «rasčaroŭvajučym». Inšy pryznaŭ, što ŭkrainskija drony prydalisia b, kali b byli razhornutyja raniej, choć i nazvaŭ amierykanskija pakazčyki na teatry vajennych dziejańniaŭ «vydatnymi».

U Biełym domie zajaŭlajuć, što apieracyja prachodzić paśpiachova, a kolkaść atak źniziłasia na 90%. Tym nie mienš, patreba ŭ novych technałohijach nastolki vysokaja, što navat syny Trampa ŭ paniadziełak abviaścili pra novaje kamiercyjnaje pradpryjemstva pa pastaŭkach ukrainskich technałohij dla dronaŭ Pientahonu.

Jak adznačaje vydańnie sa spasyłkaj na dvuch amierykanskich čynoŭnikaŭ, ihnaravańnie prapanovy Ukrainy ŭ žniŭni moža być adnym z najbujniejšych taktyčnych pralikaŭ administracyi Trampa.

Tannyja iranskija «Šachiedy» stali pryčynaj hibieli siami amierykanskich vajskoŭcaŭ. Amierykanskim siłam davodziłasia tracić miljony dalaraŭ na darahija rakiety dla pierachopu dronaŭ, jakija kaštujuć usiaho ad 20 da 50 tysiač dalaraŭ. Ukrainskija ž pierachopniki kaštujuć našmat tańniej.

«Kali i była taktyčnaja pamyłka ci promach, jakija my dapuścili napiaredadni hetaj [vajny ŭ Iranie], dyk voś jon», — pryznaŭ amierykanski čynoŭnik.

Kamientary da artykuła