Zialenski prapanavaŭ krainam Blizkaha Uschodu pamianiacca z Ukrainaj: rakiety dla Patriot na ŭkrainskija drony-pierachopniki

Padčas bryfinhu prezident Ukrainy Uładzimir Zialenski zajaviŭ, što ŭ pieršyja try dni bajavych dziejańniaŭ u rehijonie Blizkaha Uschodu było vykarystana bolš za 800 rakiet PAC-3 dla sistem Patriot. Pry hetym jon padkreśliŭ, što za ŭvieś čas vajny Ukraina nikoli nie mieła takoj kolkaści rakiet dla adbićcia ŭdaraŭ. 

Uładzimir Zialenski. Fota: Sean Gallup / Getty Images

Prezident Ukrainy taksama adznačyŭ, što pieršyja sutki atak stali šokavymi dla krain rehijona. U takich umovach, kali adbyvajucca masiravanyja ŭdary, usie vykarystoŭvajuć usie dastupnyja srodki — jak rakiety PAC-2, tak i PAC-3.

Na dumku Zialenskaha, heta źviazana ź niedachopam adpaviednaha bajavoha dośviedu, adnak ciapier hety dośvied užo źjaviŭsia, i stanovicca zrazumieła, što adnych tolki sistem Patriot niedastatkova.

Tamu Ukraina prapanuje atrymać rakiety dla sistem Patriot u abmien na svaje drony-pierachopniki, pryznačanyja dla źniščeńnia bieśpiłotnikaŭ «Šachied».

Zialenski skazaŭ, što Ukraina chacieła b damovicca ź niekatorymi krainami — jak z tymi, pra jakija možna havaryć publična, tak i z tymi, pra jakija nielha, — kab atrymać nieabchodnyja rakiety dla Patriot i pieradać im adpaviednuju kolkaść pierachopnikaŭ.

Pavodle jaho słoŭ, jon užo abmierkavaŭ hetuju ideju z ukrainskim vajskovym kiraŭnictvam.

Akramia taho, Ukraina hatovaja dzialicca svaim dośviedam baraćby ź bieśpiłotnikami i abarony infrastruktury, u tym liku naftavaj.

Kamientary da artykuła