Stała viadoma, jak Trampa rychtavali da pryniaćcia rašeńnia atakavać Iran
Pavodle infarmacyi Reuters sa spasyłkaj na krynicy, padčas padrychtoŭki apieracyi suprać Irana prezidentu ZŠA Donaldu Trampu padrabiazna rastłumačyli jak mahčymyja ryzyki, tak i patencyjnyja pieravahi takoha kroku.
Donald Tramp. Fota: Chip Somodevilla/Getty Images
Trampu paviedamili pra vierahodnaść značnych strat siarod amierykanskich vajskoŭcaŭ i pra pahrozu ŭdaraŭ u adkaz pa bazach ZŠA ŭ rehijonie, u tym liku takich, jakija niemahčyma budzie całkam adbić. Asobna abmiarkoŭvalisia ryzyki atak z boku prairanskich sił u Iraku i Siryi. Padkreślivałasia, što navat pry ŭzmocnienaj prysutnaści ZŠA na Blizkim Uschodzie sistemy supraćpavietranaj abarony nie harantujuć stopracentnaj biaśpieki.
Razam z tym Trampu pradstaŭlali situacyju jak vysokaryzykoŭnuju, ale takuju, jakaja moža pryvieści da značnych hieapalityčnych źmienaŭ u rehijonie na karyść Złučanych Štataŭ. Adzin z amierykanskich čynoŭnikaŭ adznačyŭ, što prezidentu apisvali mahčymy «epachalny zruch» na Blizkim Uschodzie ŭ vypadku pośpiechu apieracyi.
Napiaredadni pryniaćcia rašeńnia Tramp atrymaŭ šerah bryfinhaŭ ad kiraŭnikoŭ siłavych i dypłamatyčnych struktur. U abmierkavańniach udzielničali pradstaŭniki raźviedki, vajskovaha kiraŭnictva i źniešniepalityčnaha viedamstva. Śpiecyjalna ŭ Vašynhton prybyŭ kamandujučy amierykanskimi siłami na Blizkim Uschodzie, kab dałučycca da naradaŭ u Situacyjnym pakoi Biełaha doma.
28 lutaha Tramp abviaściŭ pra pačatak maštabnaj apieracyi suprać Irana; razam z ZŠA ŭdary nanosiŭ i Izrail. Taksama jon zaklikaŭ irancaŭ skarystać momant dla źmienaŭ u krainie. Iranskija ŭdary ŭ adkaz zakranuli šerah dziaržaŭ rehijona, dzie raźmieščanyja amierykanskija vajskovyja bazy.
Čytajcie taksama:
Tramp paviedamiŭ, kolki budzie praciahvacca kampanija ŭ Iranie
Stała viadoma, jak Tramp kiruje vajskovaj apieracyjaj suprać Irana
Tramp: Kali my skončym, vaźmicie ŭładu nad svaim uradam. Jon budzie vašym
ZŠA i Izrail nanosiać masiravanyja rakietnyja ŭdary pa Iranie