Saudaŭskija fondy i fantastyčnyja ździełki. Jak ziać Trampa Džared Kušnier zarablaje sotni miljonaŭ dołaraŭ
Ziać prezidenta ZŠA Donalda Trampa Džared Kušnier za apošnija hady istotna pavialičyŭ svajo bahaćcie: jaho kapitał aceńvajuć prykładna na miljard dalaraŭ. Klučavy aktyŭ — stvoranaja im inviestycyjnaja kampanija Affinity Partners, jakaja pryciahvaje srodki ad sajuźnikaŭ samoha Trampa, piša BILD.
Džared Kušnier. Fota: AP Photo / Mark Schiefelbein
Pavodle infarmacyi Frankfurter Allgemeine Zeitung, u 2021 hodzie saudaŭski dziaržaŭny fond PIF ukłaŭ u strukturu Kušniera 2 młrd dalaraŭ, niahledziačy na toje što inviestycyjny kamitet fondu nazyvaŭ kampaniju «niespraktykavanaj», krytykavaŭ «praźmiernyja» kamisii i aceńvaŭ jaje jak «niezdavalniajučuju pa ŭsich paramietrach». Rašeńnie pracisnuŭ naśledny prync Muchamied bin Sałman.
Za kiravańnie saudaŭskimi hrašyma Affinity Partners atrymlivaje 1,25% hadavych, heta kala 25 młn dalaraŭ na hod tolki z hetaj inviestycyi. Srodki ŭ fond taksama nakiravali dziaržaŭnyja struktury Abu-Dabi i Katara.
Sam Kušnier nazyvaŭ saudaŭskaha prynca svaim «siabram», a na zakidy ŭ kanflikcie intaresaŭ u intervju Financial Times adkazaŭ, što «heta nie pavinna mianie spyniać».