Ukraincy źmianili sposab pabudovy abarončych umacavańniaŭ: ciapier kvadratami

Nastup rasijan zabuksavaŭ. Heta dało ŭkraincam mahčymaść stvaryć takuju liniju abarony, jakoje robić taktyku infiltracyi śmiarotnaj. Čym adkažuć rasijanie?

Linija frontu litaralna razrezanaja na kavałki: čornyja — heta hatovyja ci zapłanavanyja da ŭmacavańnia ŭčastki, a šeryja (bolšyja, raźmieščanyja zzadu) paźniej taksama buduć padzielenyja. Krynica: clement_molin / Ch

OSINT-daśledčyk Kleman Malen (Clément Molin) u svaim akaŭncie ŭ Ch apublikavaŭ analiz situacyi na linii frontu. Daśledčyk adznačaje, što niadaŭnija niaŭdačy rasijan dazvolili Ukrainie značna ŭskładnić svaju taktyku budaŭnictva ŭmacavańniaŭ. Kožny dzień daje Ukrainie bolš času na padrychtoŭku novych pazicyj, jakija ŭ vyniku zapavolać nastupnyja rasijskija nastupy.

Malen padkreślivaje, što jakaść umacavańniaŭ značna palepšała. Jon publikuje kartu i tłumačyć sutnaść źmien:

«Asnoŭnyja abarončyja linii (žoŭtyja) pryznačanyja dla abarony ŭkrainskaha tyłu. Pamiž hetymi asnoŭnymi linijami možna znajści mnostva mienšych linij tranšej i radoŭ kalučaha drotu. Takaja stratehija drobić liniju frontu: ciapier my majem mnostva kvadrataŭ i pramavuholnikaŭ pamiž asnoŭnymi i druhasnymi linijami».

Jak tłumačyć aŭtar, na hetaj karcie žoŭtym koleram paznačanyja asnoŭnyja abarončyja linii, śvietła-žoŭtym — druhasnyja, biełym — kalučy drot (mnohaje jašče budujecca), a śvietła-błakitnym — abarončyja linii ŭ pracesie budaŭnictva. Krynica: clement_molin / Ch

Na dumku Malena, kali ŭ rasijan atrymajecca trapić u adzin z takich kvadrataŭ, jany nie znojduć tam nivodnaha ŭkrainskaha bajca — tolki miny. Ukraincy buduć znachodzicca vakoł, atakujučy rasijskija hrupy praryvu dronami i artyleryjaj, nie ryzykujučy trapić pad udar u adkaz, bo kožnaja hetaja zona, taki kvadrat faktyčna jość zakrytaj pastkaj.

Novaja taktyka, jak adznačaje daśledčyk, źjaŭlajecca vynikam analizu pavodzin praciŭnika. Ukraina zrazumieła, što Rasija nie škaduje žyvoj siły, kab prasoŭvacca pamiž bujnymi haradami, pa palach, pierš čym pačynać praniknieńnie ŭ sami harady. Kab supraćstajać hetamu, novyja abarončyja linii praciahvajucca praź sielskuju miascovaść, pierad asnoŭnymi haradami i pasiołkami. Pry hetym staŭka robicca na toje, kab novaja linija abarony była sucelnaj.

Hruntujučysia na analizie spadarožnikavych zdymkaŭ, Malen adznačaje vysokija tempy ŭkrainskaha budaŭnictva. Jon źviartaje ŭvahu, što jašče šeść miesiacaŭ tamu na Danbasie novych umacavańniaŭ nie było.

Aktualnaja karta z usimi tranšejami, paznačanymi žoŭtym, i rekami — sinim. Krynica: clement_molin / Ch

Jak śćviardžaje daśledčyk, situacyja stanovicca padobnaj u mnohich rajonach. Praŭda, usio jašče jość słabyja miescy, naprykład, paŭdniovyja podstupy da Zaparožža (ale tam reki vykonvajuć rolu pryrodnych barjeraŭ), i ŭsie zony, dzie Rasija mahła manieŭravać, ciapier zakryvajucca.

Kali situacyja zastaniecca takoj ža, jak ciapier, albo kali Ukrainie ŭdasca adcisnuć rasijan dalej, praz dva miesiacy ŭmacavańni mohuć vyhladać tak ci navat bolš maštabna. Tady kožnaje nastupleńnie budzie abychodzicca Maskvie ŭsio daražej.

Pry hetym daśledčyk ličyć, što liniju frontu ciapier amal niemahčyma prarvać, adzinaja stratehija — pranikać małymi hrupami.

«Stratehičny praryŭ abo abvał frontu ciapier zdajucca ŭsio mienš i mienš imaviernymi», — reziumuje Malen.

Kamientary da artykuła