«Zaniapad — heta vybar». Marka Rubia ŭ Miunchienie zaklikaŭ Zachad pryznać pamyłki i abnavić suśvietny paradak
Dziaržsakratar ZŠA na Miunchienskaj kanfierencyi pa biaśpiecy zajaviŭ, što Zachad dapuściŭ stratehičnyja praliki ŭ pytańniach svabodnaha handlu, klimatyčnaj palityki i mihracyi, piša Bild.
Marka Rubia i kancler Hiermanii Frydrych Mierc. Fota: Sean Gallup / Getty Images
Pavodle jaho słoŭ, krainy «razam ździejśnili hetyja pamyłki», pieradaŭšy častku suvierenitetu mižnarodnym strukturam, paddaŭšysia «klimatyčnaj siekcie i biesprecedentnaj masavaj mihracyi».
«Nacyjanalnaja biaśpieka — heta nie prosta techničnaje pytańnie. Kolki my tracim na ŭzbrajeńnie, jak my jaho vykarystoŭvajem — heta važnyja pytańni, ale nie samyja klučavyja. Klučavoje pytańnie, na jakoje my pavinny adkazać: što mienavita my abaraniajem? Armii zmahajucca za ludziej, armii zmahajucca za nacyi, armii zmahajucca za ład žyćcia», — adznačyŭ Rubia.
Kiraŭnik Dziarždepartamienta taksama zaklikaŭ refarmavać mižnarodnyja instytuty, a nie likvidavać ich. AAN, na jaho dumku, zdolnaja prynosić karyść, ale tak i nie zmahła vyrašyć klučavyja kryzisy.
Jon nahadaŭ, što ŭ pytańniach pieramirja ŭ Hazie i pieramoŭ pa Ukrainie spatrebiłasia amierykanskaje lidarstva.
«Zaniapad — heta vybar. ZŠA nie chočuć być kiraŭnikami kantralavanaha zaniapadu i raźličvajuć na mocnych sajuźnikaŭ», — reziumavaŭ Rubia.