ZŠA ŭkładuć 9 miljardaŭ dalaraŭ u armianskuju jadziernuju enierhietyku

ZŠA płanujuć ukłaści kala 9 miljardaŭ dalaraŭ u enierhietyčny siektar Armienii, u tym liku ŭ raźvićcio jadziernaj enierhietyki. Pra heta 9 lutaha zajaviŭ vice-prezident ZŠA Džej Dzi Vens padčas vizitu ŭ Jerevan, dzie jon vystupaŭ razam z premjer-ministram Armienii Nikołam Pašynianam, piša «Jeŭrapiejskaja praŭda».

Džej Dzi Vens z padpisanaj damovaj. Fota: Kevin Lamarque/Pool Photo via AP

Pavodle słoŭ Vensa, baki zaviaršyli pieramovy pa mižuradavaj damovie ab supracoŭnictvie ŭ śfiery mirnaha vykarystańnia jadziernaj enierhii. Realizacyja hetaj damovy adkryje mahčymaści dla novych prajektaŭ jak dla amierykanskich, tak i dla armianskich kampanij. Na pieršym etapie płanujucca inviestycyi prykładna na 5 miljardaŭ dalaraŭ, a na druhim — jašče na 4 miljardy.

Vice-prezident ZŠA padkreśliŭ, što prajekt budzie vyhadny abiedźvium krainam, bo paspryjaje ŭmacavańniu enierhietyčnaj biaśpieki, ustojlivaści enierhasistemy i stvareńniu novych pracoŭnych miescaŭ.

Jon taksama adznačyŭ, što ŭ Armienii płanujecca vykarystańnie małych modulnych reaktaraŭ, to-bok sučasnych amierykanskich technałohij.

Vens dadaŭ, što ZŠA redka iduć na ekspart takich adčuvalnych technałohij, i heta stała mahčymym u tym liku dziakujučy davieru da armianskaha kiraŭnictva.

Raniej stała viadoma, što Džej Dzi Vens taksama naviedaje Azierbajdžan, kab zamacavać damoŭlenaści adnosna budaŭnictva handlova-tranzitnaha kalidora.

Nahadajem, u žniŭni minułaha hoda prezident Azierbajdžana Ilcham Alijeŭ i premjer Armienii Nikoł Pašynian u prysutnaści prezidenta ZŠA Donalda Trampa padpisali pahadnieńnie ab stvareńni tranzitnaha maršrutu TRIPP z asnoŭnaj terytoryi Azierbajdžana ŭ Nachičevanski ankłaŭ praz Armieniju. Praktyčnaja realizacyja hetaha prajekta, uklučajučy pačatak budaŭničych rabot, zapłanavanaja na 2026 hod.

Kamientary da artykuła