U Japonii papularny fiestyval admianili z-za napłyvu turystaŭ

U Japonii ŭłady skasavali adzin ź viadomych fiestyvalaŭ ćvicieńnia sakury z-za praźmiernaha napłyvu turystaŭ i niezadavolenaści miascovych žycharoŭ. Havorka idzie pra fiestyval u horadzie Fudzijosida kala hary Fudzi, jaki tradycyjna prachodziŭ u parku Arakurajama Senhen. Sioleta jaho vyrašyli nie pravodzić, piša The New York Post.

Fudzijosida. Fota: Wikimedia Commons

Jak paviedamili haradskija ŭłady, pryčynaj stała pavieličeńnie vypadkaŭ nieprystojnych pavodzin turystaŭ. Čynoŭniki adznačajuć, što rost patoku naviedvalnikaŭ značna ŭzmacniŭsia praz papularnyja videa i fota ŭ sacyjalnych sietkach.

Mer Fudzijosidy Sihiera Charyuci zajaviŭ, što za pryhožymi krajavidami chavajecca surjoznaja prablema: pad pahrozaj apynulisia spakoj i biaśpieka miascovych žycharoŭ. Pavodle jaho słoŭ, ułady vymušanyja byli pajści na taki krok, kab abaranić umovy žyćcia haradžan. Fiestyval pravodziŭsia kala dziesiaci hadoŭ.

Raniej padčas ćvicieńnia sakury park naviedvali kala dziesiaci tysiač čałaviek na dzień, a za hod — da dvuchsot tysiač turystaŭ. Na fonie ahulnaha turystyčnaha bumu nahruzka na horad značna ŭzrasła. U 2025 hodzie Japoniju naviedała bolš za 42 miljony turystaŭ — heta rekordny pakazčyk.

Žychary Fudzijosidy skardzilisia na pierapoŭnienyja vulicy, pastajannyja korki, śmiećcie, kinutyja niedakurki i niezakonnaje praniknieńnie turystaŭ na pryvatnyja terytoryi. Paviedamlałasia taksama pra vypadki, kali hości zachodzili ŭ žyłyja damy, kab skarystacca tualetam, abo spraŭlali patrebu ŭ dvarach. Asablivuju tryvohu vykazvali baćki školnikaŭ, bo turysty pieraškadžali dzieciam pa darozie ŭ škołu.

Pry hetym u haradskoj administracyi pryznajuć, što admiena fiestyvalu nie abaviazkova źmienšyć kolkaść turystaŭ. Park Arakurajama Senhen ź vidam na haru Fudzi, sakury i piacijarusnuju pahadu ŭsio adno zastaniecca papularnym miescam dla naviedvańnia viasnoj.

Kamientary da artykuła