Zialenski: ZŠA chočuć zaviaršyć vajnu da pačatku leta
Uładzimir Zialenski paviedamiŭ, što amierykanski bok prapanavaŭ novaje enierhietyčnaje pieramirje, na jakoje Ukraina pahadziłasia. Adnak rasijskaja delehacyja paabiacała dać adkaz paźniej, piša Bi-bi-si.
Uładzimir Zialenski i Donald Tramp 28 śniežnia 2025 hoda. Fota: AP Photo / Alex Brandon
Taksama ZŠA prapanavali ŭpieršyniu pravieści sustreču dźviuch pieramoŭnych hrup — Ukrainy i Rasii — na terytoryi Amieryki.
Pavodle jaho słoŭ, jak miarkujecca, sustreča adbudziecca ŭ Majami praz tydzień. Ukraina ŭžo paćvierdziła svoj udzieł.
Raniej pres-sakratar Kramla Dźmitryj Piaskoŭ zajaŭlaŭ, što novy raŭnd pieramoŭ adbudziecca «chutka», adnak pra ich praviadzieńnie ŭ ZŠA havorki nie było.
Zialenski taksama vykazaŭsia pra temy, pa jakich padčas pieramoŭ dahetul nie ŭdajecca dasiahnuć damoŭlenaściaŭ. Jon znoŭ padkreśliŭ, što «samyja składanyja» ź ich mohuć być vyniesienyja na mahčymuju trochbakovuju sustreču lidaraŭ Ukrainy, ZŠA i RF.
Što da Danieckaj vobłaści, jakuju Rasija patrabuje pieradać joj całkam, Zialenski adznačyŭ, što Ukraina nastojvaje na pryncypie «staim tam, dzie staim» dla spynieńnia ahniu.
Ukraina jašče raz paćvierdziła svaje pazicyi ŭ pytańni Danbasa. «Staim tam, dzie staim» — heta samaja spraviadlivaja i najbolš nadziejnaja na siońnia madel dla spynieńnia ahniu, na naš pohlad», — padkreśliŭ Zialenski.
ZŠA, pavodle jaho słoŭ, prapanujuć kampramis — stvareńnie svabodnaj ekanamičnaj zony ŭ Danbasie, adnak ni Ukrainu, ni Rasiju taki varyjant nie zadavalniaje.
Zialenski dadaŭ, što pa-raniejšamu niama razumieńnia adnosna budučyni Zaparožskaj AES.