U ZŠA vynieśli pažyćciovy prysud mužčynu, jaki rabiŭ zamach na Trampa

U ZŠA sud asudziŭ da pažyćciovaha źniavoleńnia 59‑hadovaha Rajana Ruta, jakoha pryznali vinavatym u zamachu na Donalda Trampa ŭ 2024 hodzie, kali toj bałatavaŭsia ŭ prezidenty. Pra heta paviedamlaje Fox News.

Rajan Rut. Fota: Martin County Sheriff's Office / AP

Kančatkovaje rašeńnie było vyniesiena paśla taho, jak sud pryznaŭ Ruta vinavatym pa piaci punktach fiederalnaha abvinavačańnia. Siarod ich — sproba zabojstva adnaho z hałoŭnych kandydataŭ u prezidenty ZŠA, napad na supracoŭnika fiederalnych pravaachoŭnych orhanaŭ i niezakonnaje vałodańnie ahniastrelnaj zbrojaj.

Prakurory nastojvali na pažyćciovym źniavoleńni, u toj čas jak abarona prasiła abmiežavacca 20 hadami turmy plus abaviazkovym siamihadovym terminam pa adnym z abvinavačańniaŭ, źviazanych sa zbrojaj. Abviaščeńnie prysudu było pieraniesiena, bo abvinavačany vyrašyŭ skarystacca pasłuhami prafiesijnaha advakata i admoviŭsia ad samastojnaj abarony.

Pavodle viersii śledstva, Rut niekalki tydniaŭ rychtavaŭ zamach. 15 vieraśnia 2024 hoda, kali Tramp znachodziŭsia ŭ svaim holf-kłubie ŭ Fłarydzie, abvinavačany, chavajučysia ŭ kustach, navioŭ na jaho vintoŭku. Adnak supracoŭnik Sakretnaj słužby zaŭvažyŭ jaho raniej i adkryŭ ahoń. Paśla hetaha Rut kinuŭ zbroju i ŭciok, tak i nie zrabiŭšy nivodnaha strełu, ale paźniej byŭ zatrymany.

Raniej amierykanskija žurnalisty pisali, što Rut nibyta chacieŭ dałučycca da ŭkrainskich uzbrojenych farmiravańniaŭ dla ŭdziełu ŭ vajnie suprać Rasii, ale jamu admovili. Paśla hetaha jon, jak śćviardžajecca, sprabavaŭ vierbavać zamiežnikaŭ u mižnarodny lehijon Ukrainy, adnak jaho idei inšyja bajcy nazyvali nieadekvatnymi.

Kamientary da artykuła