Chakiery paŭhoda raspaŭsiudžvali virusy praz papularny tekstavy redaktar
Niedzie kala paŭhoda chakiery raspaŭsiudžvali škodnasnyja prahramy praz aficyjnuju sistemu abnaŭleńnia papularnaha tekstavaha redaktara Notepad++. Pra heta paviedamili sami raspracoŭščyki na sajcie prajekta.
Zdymak ilustracyjny. Fota: freepik.com
Z červienia pa śniežań 2025 hoda złamyśniki mieli mahčymaść kantralavać trafik prahramy i vybaračna atakavali karystalnikaŭ, u asnoŭnym źviazanych ź biznesam va Uschodniaj Azii. Ataka stała mahčymaj z-za ŭzłomu infrastruktury chostynh-pravajdara, na siervierach jakoha znachodziŭsia sajt Notepad++.
Padčas abnaŭleńnia prahramy zapyty karystalnikaŭ pieranakiroŭvalisia na sierviery złamyśnikaŭ, adkul zamiest biaśpiečnych fajłaŭ zahružalisia škodnasnyja manifiesty. Paśla traplańnia ŭ sistemu virus źbiraŭ techničnuju infarmacyju pra kampjutar i zapuščanyja pracesy, vykarystoŭvajučy standartnyja srodki apieracyjnaj sistemy. Sabranyja danyja zachoŭvalisia ŭ asobnym fajle i pieradavalisia chakieram.
Raspracoŭščyk Notepad++ Don Cho paviedamiŭ, što rasśledavańnie, praviedzienaje razam sa śpiecyjalistami pa kibierbiaśpiecy, pakazała: aktyŭnaja faza ataki pačałasia jašče ŭ červieni 2025 hoda. Choć sierviery chostynhu byli ačyščanyja padčas techničnaha absłuhoŭvańnia ŭ vieraśni, złamyśniki praciahvali mieć dostup da ŭnutranych servisaŭ i pierachoplivać trafik da pačatku śniežnia.
Ciapier kamanda Notepad++ całkam źmianiła chostynh-pravajdara i ŭmacavała sistemu abarony. Kab harantavać biaśpieku i vyklučyć mahčymaść sačeńnia, karystalnikam rekamiendujuć uručnuju spampavać i ŭstalavać viersiju 8.9.1 z aficyjnaha sajta.
U biahučaj viersii ŭžo realizavanaja abaviazkovaja pravierka siertyfikataŭ, a ŭ nastupnym vypusku raspracoŭščyki płanujuć jašče bolš uzmacnić miechanizmy pravierki i biaśpieki.
Čytajcie taksama:
HUBAZiK moh «zašyć» virus u «bazy źviestak padpisantaŭ niezaležnych miedyja». Voś jak abaranicca