Łukašenka raskazaŭ, čamu pamianiaŭ kiraŭnika Viciebskaj vobłaści

15 studzienia Alaksandr Łukašenka na pasadu staršyni Viciebskaha abłvykankama zamiest Alaksandra Subocina pryznačyŭ Alaksandra Rahožnika — byłoha pasła Biełarusi ŭ Rasii i eks-ministra pramysłovaści. Ciapier na naradzie, pryśviečanaj raźvićciu Viciebskaj vobłaści, jon patłumačyŭ, čamu pryniaŭ takoje rašeńnie.

Alaksandr Subocin

Łukašenka śćviardžaje, što rašeńnie ab zamienie kiraŭnictva Viciebščyny było pryniata paśla śpiecyjalnaj pravierki i nazirańnia za situacyjaj u vobłaści.

Maŭlaŭ, paśla narady pa situacyi na Viciebščynie ŭ kastryčniku minułaha hoda jon čakaŭ ad Subocina bolšaj aktyŭnaści: dumaŭ, što hubiernatar adrazu pačnie jeździć pa haspadarkach, sustrakacca ź ludźmi, unikać u prablemy i patrabavać vynikaŭ ad padnačalenych. Adnak, jak śćviardžaje Łukašenka, hetaha nie adbyłosia.

Akramia taho, jamu dałažyli vyniki manitorynhu razmoŭ viciebskich čynoŭnikaŭ paśla toj narady. Publična jany pahadžalisia ź jaho słovami, ale, pavodle apieratyŭnaj infarmacyi, u kułuarach niekatoryja ź ich raźličvali, što z časam usio zabudziecca i ničoha istotnaha mianiać nie daviadziecca. Łukašenka padkreśliŭ, što tak nie budzie i «ŭlažacca» situacyja nie moža.

U vyniku jon nibyta pryjšoŭ da vysnovy, što pry zachavańni raniejšaha kiraŭnictva ŭ vobłaści ničoha nie źmienicca, tamu i vyrašyŭ zamianić staršyniu abłvykankama.

Dniami stała viadoma, što były staršynia Viciebskaha abłvykankama Alaksandr Subocin, jakoha Łukašenka niadaŭna adpraviŭ u adstaŭku, budzie novym biełaruskim ministram pa techničnym rehulavańni Jeŭrazijskaj ekanamičnaj kamisii.

Alaksandr Subocin užo zajmaŭ pasadu ministra pa pramysłovaści i APK u JEEK ź vieraśnia 2018‑ha pa studzień 2020 hoda. U sakaviku 2020‑ha jon byŭ pryznačany pamočnikam Łukašenki pa Mahiloŭskaj vobłaści, u lipieni taho ž samaha hoda staŭ vice-premjeram, a z 13 śniežnia 2021‑ha pa 15 śniežnia 2025‑ha kiravaŭ Viciebskaj vobłaściu. Ciapier ža, prajšoŭšy hety kruh karjernaha rostu, jon viarnuŭsia dakładna ŭ toj ža samy punkt, u jakim byŭ šeść hadoŭ tamu. 

Kamientary da artykuła