U rasijskich VNU admianiajuć bakałaŭryjat i mahistraturu

U rasijskich univiersitetach vyrašyli admovicca ad zvykłaj sistemy bakałaŭryjatu i mahistratury i pierajści na novuju madel vyšejšaj adukacyi. 

Hałoŭny korpus Maskoŭskaha dziaržaŭnaha ŭniviersiteta. Fota: Wikimedia Commons

Pačynajučy z nastupnaha navučalnaha hoda atrymać stupień bakałaŭra abo mahistra ŭ rasijskich VNU budzie niemahčyma. Zamiest bakałaŭryjatu ŭvodzicca tak zvanaja bazavaja vyšejšaja adukacyja, jakaja budzie doŭžycca ad čatyroch da šaści hadoŭ u zaležnaści ad śpiecyjalnaści. Mahistraturu zamienić śpiecyjalizavanaja vyšejšaja adukacyja praciahłaściu ad adnaho da troch hadoŭ.

Jak rastłumačyła pieršaja namieśnica staršyni kamiteta Dziarždumy RF pa navucy i vyšejšaj adukacyi Ksienija Haračava, faktyčna havorka idzie pra abnoŭleny farmat mahistratury z roznymi napramkami — prafiesijnym, kiraŭničym i daśledčym.

Jašče adno istotnaje novaŭviadzieńnie — pastupać na biudžetnyja miescy na śpiecyjalizavanuju vyšejšuju adukacyju zmohuć vypuskniki lubych bazavych prahram. Aśpiranturu ž płanujuć vyłučyć u asobny ŭzrovień prafiesijnaj adukacyi.

Hetuju madel, jakaja pryjšła na źmienu Bałonskaj sistemie, u Rasii vypraboŭvali z 2022 hoda ŭ šaści ŭniviersitetach. Ciapier ułady vyrašyli raspaŭsiudzić jaje na bolšuju kolkaść VNU krainy. 

Studenty, jakija pastupili va ŭniviersitety raniej, praciahnuć navučańnie pa starych praviłach. Źmieny zakranuć tolki tych, chto budzie pastupać u 2026 hodzie, a pierachod na novuju sistemu adbudziecca pastupova.

Kamientary da artykuła