Nastupny raŭnd pieramoŭ pamiž Rasijaj i Ukrainaj projdzie biez ZŠA

Dziaržsakratar ZŠA Marka Rubia paviedamiŭ, što čarhovy raŭnd pieramoŭ pamiž Rasijaj i Ukrainaj, zapłanavany na 1 lutaha, projdzie biez udziełu Złučanych Štataŭ i ŭ dvuchbakovym farmacie. Pra heta jon zajaviŭ padčas słuchańniaŭ u kamitecie pa zamiežnych spravach Sienata ZŠA.

Padčas apošnich pieramoŭ u Abu-Dabi. Fota: TASS

Pa słovach Rubia, amierykanski bok tearetyčna moža dałučycca da pieramoŭ, ale navat u takim vypadku ŭ ich nie buduć udzielničać śpiecpradstaŭnik prezidenta ZŠA Styŭ Uitkaf i Džared Kušnier, jakija raniej brali ŭdzieł u trochbakovaj sustrečy z Rasijaj i Ukrainaj u kancy studzienia.

Asnoŭnaj temaj pieramoŭ zastajecca pytańnie terytaryjalnych pretenzij, u pieršuju čarhu vakoł Danbasa. Ciapier baki sprabujuć vyśvietlić, ci mahčyma nablizić svaje pazicyi, adnak, jak adznačyŭ Rubia, da zhody pa hetym pytańni jany pakul nie dajšli. Jon taksama padkreśliŭ, što dla ŭkrainskaha boku navat razhlad mahčymaści terytaryjalnych sastupak źjaŭlajecca palityčna vielmi składanym.

Papiaredni raŭnd trochbakovych pieramoŭ u Abu-Dabi ŭdzielniki acanili jak kanstruktyŭny i źmiastoŭny. Prezident Ukrainy Uładzimir Zialenski zajaŭlaŭ, što tam abmiarkoŭvaŭsia šyroki śpiektr pytańniaŭ, źviazanych z mahčymym spynieńniem vajny, i kolkaść sprečnych punktaŭ u mirnym płanie ŭdałosia skaracić. Adnak terytaryjalnaje pytańnie zastajecca niavyrašanym, bo Rasija praciahvaje patrabavać pieradačy ŭsiaho Danbasa.

Kamientary da artykuła