U Minskim pałacy dziaciej i moładzi adkryli imitacyju turmy

U Minskim pałacy dziaciej i moładzi adkryli interaktyŭnuju placoŭku «Biaśpiečnaja prastora», dzie jość imitacyja turemnaj kamiery. U cyrymonii adkryćcia ŭdzielničali i pradstaŭniki Ministerstva ŭnutranych spraŭ, piša Telegraf.news.

Na sajcie Minharvykankama patłumačyli, što takim čynam vyrašyli naładzić «novyja, bolš efiektyŭnyja formy prafiłaktyčnaj raboty z moładździu». Tam zapeŭnili, što novaja navučalnaja prastora budzie pracavać štodnia, a školniki buduć udzielničać u treninhach.

Novaja placoŭka pryznačanaja dla navučańnia školnikaŭ praviłam pavodzin u internecie i raskazu pra ryzyki, źviazanyja z narkotykami. U jakaści navočnaha dapamožnika tam zrabili simulatar turmy.

Načalnik upraŭleńnia pa narkakantroli i supraćdziejańni handlu ludźmi HUUS Minharvykankama Kirył Biarkozaŭ patłumačyŭ, što takim čynam chočuć nahladna pakazać dzieciam nastupstvy ŭdziełu ŭ kibier– i narkazłačynstvach.

U častcy ekspazicyi, dzie zrabili imitacyju turmy, dzieciam raskazvajuć historyi asudžanych 17‑hadovych dziaŭčynki i chłopčyka, jakim pryznačyli «praciahłyja terminy» za prodaž narkotykaŭ.

«U farmacie žyvoha efiru jany raskazvajuć, jak byli ŭciahnutyja ŭ złačynnuju dziejnaść, stracili svabodu i ŭžo ŭ miescach pazbaŭleńnia voli pieraasensavali svajo žyćcio», — patłumačyŭ zadumu Kirył Biarkozaŭ.

Taksama školnikam prapanujuć paŭdzielničać u 3D-imitacyi z VR-akularami (virtualnaj realnaści), dzie im prapanujecca pahadzicca na ŭžyvańnie narkotykaŭ albo pasprabavać siabie ŭ jakaści zakładčyka.

«Usie scenaryi zakančvajucca adnolkava trahična», — papiaredziŭ pradstaŭnik RUUS Minska.

Kamientary da artykuła