«Madura amierykancy vyvieźli ź Vieniesueły taksama ŭ miežach kryminalnaj spravy»

Toj fakt, što Łukašenka adpraviŭ svaju pres-sakratarku Natallu Ejsmant paviedamić rasijskamu ahienctvu «RIA Novosti», što takaja pierśpiektyva jaho «mała chvaluje», śviedčyć pra toje, što ŭ Minsku takim raźvićciom padziej vielmi zaniepakojenyja, ličyć palityčny analityk Alaksandr Frydman.

Alaksandr Łukašenka. Fota: Ramil Sitdikov Pool Photo via AP

Vopyt pakazvaje, što Ejsmant apieratyŭna źviazvajecca z «RIA Novosti» mienavita tady, kali ŭładam Biełarusi nieabchodna na štości adreahavać — i adreahavać terminova, nie čakajučy źjaŭleńnia Łukašenki na publicy.

Viersija pra toje, što kryminalnaja sprava va Ukrainie moža pieraškodzić kantaktam Vašynhtona i Minska, nie padajecca pierakanaŭčaj. Na Pucina i Nietańjachu Mižnarodnym kryminalnym sudom vydadzienyja ordary na aryšt, ale heta Trampu (i nie tolki jamu) nijakim čynam nie zaminaje vieści ź imi spravy. Što ŭžo tut kazać pra kryminalnuju spravu va Ukrainie.

Bolš imavierna, što kryminalnaja sprava moža vykraślić nienavisnaha ŭkrainskamu boku Łukašenku ź liku ŭdzielnikaŭ jakich-niebudź farmataŭ mirnych pieramoŭ. I mienavita hetuju metu moža stavić pierad saboj Kijeŭ.

Intryha, adnak, zaklučajecca nie ŭ tym, ci budzie zaviedziena sprava, a ŭ tym, ci buduć amierykancy ŭ ciapierašniaj situacyi hetamu pieraškadžać. A kali buduć, to što jany paprosiać (zapatrabujuć) u Łukašenki za «vyrašeńnie hetaj prablemy».

Nu i jašče adna reč pavinna niepakoić Łukašenku. U Kijevie siońnia nastaŭ «čas Budanava», ź jakim i źviazvajuć źmieny kursu ŭ adnosinach da Biełarusi.

Akramia ŭsiaho inšaha, Budanaŭ adčuvaje vidavočnuju słabaść da ryzykoŭnych, sprečnych, ale vidoviščnych śpiecapieracyj u styli izrailskich i amierykanskich śpiecsłužbaŭ. I tak: Madura amierykancy vyvieźli ź Vieniesueły taksama ŭ miežach kryminalnaj spravy.

Kamientary da artykuła