Karajeŭ raskazaŭ, dzie ciapier pracujuć jaho syny
Kiraŭnik Hrodzienskaj vobłaści i były ministr unutranych spraŭ Juryj Karajeŭ u kulinarnaj pieradačy na STB raskazaŭ pra svaju siamju.
Starejšy syn Hierman praciahvaje pracavać trenieram pa karate ŭ kłubie «Tasaj». Jon treniruje dziaciej u niekalkich škołach.
Hierman Karajeŭ. Skrynšot: german_tasai / Instagram
«A małodšy ŭčora prylacieŭ z Kitaja, dzie prachodzić navučańnie kitajskaj movie i pracuje na adnu z pramysłovych arhanizacyj. U ich tam kaapieracyja z kitajcami i im patrebny śpiecyjalist, jaki budzie i pierakładčyk, i mieniedžar pa tavarach spadarožnych», — raskazaŭ kiraŭnik Hrodzienščyny.
Aleh Karajeŭ. Fota: sacyjalnyja sietki.
Raniej małodšy syn Karajeva Aleh pracavaŭ cyvilnym rabotnikam u vajskovaj čaści 5448. A paśla vučyŭsia ŭ intaresach MUS u Kitai. Heta praktyka, kali za košt biudžetu, pa konkursie, na niekalki hod na vučobu adpraŭlajucca maładyja aficery.
Karajeŭ taksama raskazaŭ, što jaho baćki pa-roznamu ŭspryniali, kali jon pajechaŭ słužyć u Biełaruś.
«Baćka ŭspryniaŭ narmalna, a maci ŭsio žyćcio pakutavała, što ja nie žyvu doma i nie žyvu ŭ Asiecii. Vajskovy čałaviek nie moža, budujučy karjeru i słužačy, žyć na nievialikaj prastory i słužyć na adnym miescy — jon abaviazany pieramiaščacca».
Z žonkaj Karajeŭ paznajomiŭsia ŭ Minsku padčas słužby, sustreŭ u restaranie. Bolš jak praz hod paśla znajomstva para ažaniłasia. «Žonka zaŭsiody jeździła za mnoj. Jana da hetaha davoli spakojna staviłasia».
Na radzimie ŭ Asiecii Karajeŭ byvaje raz ci dva na hod. Apošni raz byŭ u listapadzie na viasielli plamieńnika, dzie sabrałasia 300 čałaviek. A na viasielli jaho stryječnaha brata ŭ 2024‑m było ažno 600 haściej.