Za apošnija dva tydni imihracyjnyja słužby ZŠA zatrymali nie mienš za 7 biełarusaŭ

Nie mienš za 7 biełarusaŭ zatrymali imihracyjnyja słužby ZŠA za apošnija dva tydni. Asacyjacyja biełarusaŭ Amieryki (ABA) sa spasyłkaj na danyja inicyjatyvy Byaction paviedamiła, što zatrymańni prajšli ŭ štatach Miniesota, Fłaryda, Ilinojs, Akłachoma i Aryzona, piša vydańnie «Pozirk».

Imihracyjny centr Błuboniet u Ansonie, štat Techas. Zdymak ilustracyjny. Fota: Imihracyjnaja i mytnaja słužba ZŠA

Pavodle infarmacyi vałancioraŭ zhadanaj inicyjatyvy, usie zatrymanyja ŭjechali ŭ krainu bolš za dva hady tamu, znachodzilisia ŭ lehalnym imihracyjnym pracesie. Jany byli zatrymanyja padčas vypadkovych pravierak (spynieńniaŭ) aŭtamabilaŭ.

Pry hetym anivodzin ź ich nie mieŭ kryminalnaha minułaha i nie čakaŭ, što jaho mohuć zatrymać. Adzin z zatrymanych byŭ vyzvaleny pad zakład, astatnija čakajuć mahčymaha adpaviednaha rašeńnia.

Byaction rekamienduje biełarusam, jakija znachodziacca ŭ ZŠA, padrychtavacca da mahčymych zatrymańniaŭ, dla čaho, u pryvatnaści, jak maha chutčej znajści amierykanskaha hramadzianina abo pastajannaha rezidenta (uładalnika hryn-karty), jaki moh by stać ich paručalnikam. Taksama rekamiendujecca padrychtavać hrošy dla zakładu na vypadak, kali paručalnik nie zmoža ŭnieści ŭsiu jaho nieabchodnuju sumu (ad 5 tysiač dalaraŭ).

Inicyjatyva taksama prapanuje biełarusam zahadzia abmierkavać sa svaim advakatam umovy padačy chadajnictva ab zakładzie (bond), a ŭ vypadku adsutnaści takoj — znajści advakata, jaki moh by pry nieabchodnaści padać takoje chadajnictva.

Taksama rekamiendujecca zahadzia padrychtavać listy padtrymki (letters of support) ad znajomych, siabroŭ i kaleh, vyvučyć na pamiać numary telefonaŭ advakata ci blizkaha čałavieka i «zahadzia padumać jak vyrašyć svaje spravy pry adsutnaści na praciahu 2‑4 tydniaŭ».

U Byaction adznačyli, što ŭ vypadku ŭjezdu ŭ ZŠA praz paŭdniovuju miažu na padstavie dazvołu (parole) z vykarystańniem dadatku pamiežnaj słužby ZŠA (CBP one) vierahodnaść admovy ŭ zakładzie źjaŭlajecca vielmi vysokaj. U hetym vypadku nieabchodna być hatovym abaraniać svaju spravu ŭ imihracyjnaj turmie da kanca pracesu.

Dla maksimalna mahčymaj padrychtoŭki spravy biełarusam rekamiendujuć abnavić i padpisać formu I-589 (zajavu na nadańnie prytułku, a ŭ vypadku admovy — na abaronu ad departacyi), abaviazkova abmierkavaŭšy heta sa svaim advakatam.

Pryvodziacca kantaktnyja telefony i adras elektronnaj pošty inicyjatyvy dla zvarotu ŭ vypadku nieabchodnaści.

Letaś u vieraśni ABA paviedamlała, što nie mienš jak 9 biełarusaŭ, vyklikanych dla čarhovaj «adznaki» ŭ imihracyjnuju i mytnuju słužbu ZŠA, byli zatrymanyja i źmieščanyja ŭ admysłovyja centry, u dačynieńni da ich pravodziłasia pravierka.

Kamientary da artykuła