U Francyi paviedamili padrabiaznaści pra rasijski cieniavy tankier, zatrymany ŭ Mižziemnym mory

Zatrymanym tankieram akazaŭsia naftavy tankier Grinch, jaki płyŭ z Murmanska pad falšyvym ściaham, paviedamiła Mižziemnamorskaja marskaja prefiektura Francyi.

Fota: x.com/EtatMajorFR

Zatrymańnie adbyłosia 22 studzienia ŭ mory Albaran — na zachadzie Mižziemnaha mora, niedaloka ad Hibrałtarskaha praliva. Apieracyja pravodziłasia na padstavie art. 110 Kanviencyi AAN ab marskim pravie i mieła na mecie pravierku sapraŭdnaj prynaležnaści sudna, bo jaho padazravali ŭ vykarystańni falšyvaha ściaha. U zatrymańni tankiera, akramia Francyi, udzielničała i Vialikabrytanija.

Fota: x.com/EtatMajorFR

Pravierka dakumientaŭ na borcie paćvierdziła padazreńni francuzskich uładaŭ, tamu sprava była pieradadziena prakuroru ŭ Marseli.

Fota: x.com/EtatMajorFR

Zhodna ź mižnarodnym pravam i pa patrabavańni prakurora tankier byŭ źniaty z maršrutu i ŭ supravadžeńni nacyjanalnaha fłotu byŭ nakiravany na śpiecyjalnuju stajanku dla dalejšaj pravierki.

Ź infarmacyi vydańnia BFMTV, tankier ruchaŭsia pad ściaham Kamorskich astravoŭ, pad jakim jon pakazvajecca i na sajtach adsočvańnia marskoha ruchu. Tankier rehularna dastaŭlaŭ naftu ŭ porty Kitaja i Indyi.

BFMTV taksama adznačaje, što ŭ brytanskim śpisie tankieraŭ cieniavoha fłotu Rasii jon viadomy pad nazvaj Grinch, a ŭ jeŭrapiejskim i amierykanskim — jak Carl.

Kamientary da artykuła