Biełaruski žurnalist lečycca ad ankazachvorvańnia i prosić dapamohi

Žurnalist Michaił Karnievič pakinuŭ Biełaruś praź pieraśled za prafiesijnuju dziejnaść. U emihracyi jon prachodzić lačeńnie ad ankałahičnaha zachvorvańnia i maje patrebu ŭ padtrymcy, kab pieražyć pieryjad terapii i nie zastacca biez žylla i srodkaŭ, piša «Bajsoł».

Michaił Karnievič. Fota: «Bajsoł»

«Ja rodam z Hrodna i amal usio žyćcio prapracavaŭ u žurnalistycy, — raspaviadaje Michaił. — Paśla ŭniviersiteta byŭ karespandentam haziet «Pahonia» i «Birža infarmacyi», staŭ adnym z suzasnavalnikaŭ apošniaj».

Kali hetyja vydańni pa palityčnych pryčynach zakryli, Karnievič praciahnuŭ pracu ŭ jakaści karespandenta «Radyjo Svaboda» pa Hrodzienskaj vobłaści, a z 2018 hoda supracoŭničaŭ z hazietaj «Narodnaja Vola».

Cisk z boku ŭładaŭ pačaŭsia zadoŭha da 2020 hoda, a administratyŭnyja aryšty dla niezaležnaha žurnalista stali faktyčna častkaj pracoŭnaha pracesu.

Padčas vybaraŭ 2020 hoda Michaił aśviatlaŭ padziei ŭ Hrodnie, rychtavaŭ materyjały dla niezaležnych redakcyj. U studzieni 2022 h. redakcyja «Narodnaj Voli» nakiravała jaho rabić materyjał pra łahier mihrantaŭ na biełaruska-polskaj miažy ŭ rajonie punktu propusku «Bruzhi». Dziela hetaha patrabavaŭsia dazvoł Hrodzienskaha abłvykankamu. Michaś niekalki razoŭ telefanavaŭ u ideałahičny adździeł, ale tak i nie atrymaŭ vyraznaha adkazu. 21 studzienia, na nastupny dzień paśla čarhovaha zvanka, da jaho damoŭ pryjšli siłaviki. U kvatery praviali pieratrus, zabrali ŭsiu techniku, a Michaiła dastavili ŭ RAUS, dzie skłali administracyjny pratakoł.

Siłavikoŭ cikavili jahonyja publikacyi za 2018 hod na «Radyjo Svaboda», jakoje da taho času było abvieščana «ekstremisckim farmavańniem». Vynikam stali troje sutak u IČU, štraf i kanfiskacyja techniki.

Nazirańnie za žurnalistam praciahvałasia: siłaviki navat naviedalisia da novych uładalnikaŭ jaho byłoj dačy ŭ pošukach materyjałaŭ. «Advakat kazaŭ mnie, što treba źjazdžać ź Biełarusi, tamu što za administracyjnaj spravaj z vysokaj vierahodnaściu rušyć uśled kryminalnaja».

Michaś pakinuŭ krainu, a praz tydzień paśla adjezdu siłaviki viarnulisia znoŭ i, nie zastaŭšy haspadara, pakinuli ŭ paštovaj skryni pozvu. Žurnalist miarkuje, što śpiecsłužby ŭzłamali kanfiskavany kampjutar i znajšli tam masiŭ žurnalisckich materyjałaŭ, jakija jon drukavaŭ pad psieŭdanimam.

Z sakavika 2022 hoda Michaił žyvie ŭ Polščy, adnak termin jaho statusu časovaha znachodžańnia zaviaršajecca. Praz adsutnaść stabilnaj pracy jon vymušany padavacca na mižnarodnuju achovu. Asnoŭny dachod — redkija zamovy, jakich chapaje tolki na minimalnyja vydatki.

U 2025 hodzie stan zdaroŭja Michaiła rezka pahoršyŭsia. Abśledavańnie vyjaviła ankałahičnaje zachvorvańnie. Biełarus pieranios apieracyju i prajšoŭ niekalki sieansaŭ pramianiovaj terapii. Lačeńnie praciahvajecca, pryznačanyja preparaty i dalejšaje nazirańnie ŭ ankacentry.

«Mianie lečać pa strachoŭcy, ale jana nie pakryvaje štodzionnyja vydatki na žyćcio padčas terapii, — kaža Michaił. — Ja tut adzin, bieź siamji i blizkich, pracavać na poŭnuju siłu nie mahu, a ad momantu padačy na ​​mižnarodnuju achovu naohuł nie pracaŭładkujusia pa zakonie».

Padtrymka, u jakoj Michaił maje patrebu, nieabchodnaja dla apłaty žylla, pakupki lekaŭ i vitaminaŭ, reabilitacyi paśla lačeńnia i bazavych vydatkaŭ na charčavańnie.

«Vaša dapamoha dazvolić mnie prajści lačeńnie, nie apynuŭšysia na vulicy, adnavicca i nadalej pasprabavać viarnucca da pracy».

Suma zboru — €3000

€1400 — try miesiacy minimalnaha žylla padčas terapii;

€500 — charčavańnie i vydatki na žyćcio;

€700 — preparaty, jakija nie pakryvajucca strachoŭkaj;

€400 — reabilitacyja i adnaŭleńnie.

Padtrymać Michaiła Karnieviča možna pa spasyłcy.

Kamientary da artykuła