Desantnika, jakoha pryznavali najlepšym kamandziram uzvoda śpiecnaza, asudzili pa palityčnaj kryminałcy

U Breście vynieśli prysud 29‑hadovamu Maksimu Dudarhu. Jašče niadaŭna jon byŭ elitaj vojska i pieramahaŭ u spabornictvach desantnikaŭ, a ciapier apynuŭsia za kratami za palityku.

Maksim Dudarha. Fota ź jahonaj staronki Ukantakcie

Maksimu Dudarhu 29 hadoŭ. Chłopiec rodam z Łuninca. Usio svajo darosłaje žyćcio jon pryśviaciŭ sportu i vajskovaj słužbie. Jašče ŭ 2015 hodzie Maksim biehaŭ marafony i paŭmarafony ŭ składzie kłuba «Viktoryja».

Paźniej słužyŭ u 38‑j asobnaj desantna-šturmavoj bryhadzie ŭ Breście. U lutym 2020 hoda dziaržaŭnyja ŚMI pisali pra jaho jak pra ŭzornaha aficera: «hvardyi staršy lejtenant Dudarha staŭ najlepšym kamandziram desantnaha ŭzvoda sił śpiecyjalnych apieracyj pa vynikach spabornictvaŭ pa palavoj vyvučcy».

Padobna, što jon dasłužyŭsia da kapitana — prynamsi tak jaho paźniej padpisvali ŭ zapisnych knižkach, «kapitan Dudarha».

Maksim zajmaŭsia rovarnym sportam, udzielničaŭ u viełaprabiehach kłuba «ViełaBrest» i navat padpracoŭvaŭ kiroŭcam, voziačy spadarožnikaŭ pa maršrucie Minsk — Brest — Łuniniec.

Niezrazumieła, ci pracavaŭ Dudarha u śpiecnazie dahetul, ci ŭžo zvolniŭsia.

Brescki abłasny sud pakaraŭ jaho pavodle častak 1 i 2 artykuła 361‑4 Kryminalnaha kodeksa — «sadziejničańnie ekstremisckaj dziejnaści». Zvyčajna pa hetym artykule ciapier sudziać pa spravie Hajuna.

Prysud Dudarhi dakładna nieviadomy, ale heta chimija z nakiravańniem ci kałonija.

Kamientary da artykuła