U Mahilovie dziaŭčyna spahnała hrošy z padletka, praź jakoha jana ŭpała na eskałatary

Niepryjemny vypadak adbyŭsia ŭ mai 2025 hoda. Dziaŭčyna jechała na eskałatary na druhi pavierch handlovaha centra, kali padletak, jaki stajaŭ pierad joj vyšej, raptam straciŭ raŭnavahu i pačaŭ padać. Jon źbiŭ dziaŭčynu z noh, i abodva skacilisia ŭniz pa eskałatary.

Fota ilustracyjnaje

Paśla padzieńnia paciarpiełaja adčuła mocny bol u vobłaści levaha plača, jaje mašynaj chutkaj dapamohi dastavili ŭ traŭmatałahičny punkt.

Sudova-miedycynskaja ekśpiertyza ŭstanaviła, što ŭ dziaŭčyny byŭ zakryty pierałom łapatačnaha kanca levaj klučycy, a taksama siniaki i drapiny.

Padčas pravierki vyśvietliłasia, što pryčynaj zdareńnia stali dziejańni 14‑hadovaha padletka. Jon ruchaŭsia ŭniz pa sustrečnym eskałatary i, ubačyŭšy, što nasustrač jeduć znajomyja, schapiŭ adnaho ź ich za šyju ŭ znak pryvitańnia. Chłopiec ad niečakanaści straciŭ raŭnavahu i pačaŭ padać, źbiŭšy i dziaŭčynu.

Paciarpiełaja padała pazoŭ u sud Leninskaha rajona Mahilova, žadajučy atrymać kampiensacyju maralnaj škody z padletka, jaho zakonnych pradstaŭnikoŭ, a taksama z ułaśnika eskałatara. Jana adznačyła, što doŭhi čas była na balničnym, nie mahła paŭnavartasna vučycca i pracavać nad dypłomam — a była studentkaj vypusknoha kursa. Pamier maralnaj škody jana acaniła ŭ 25 tysiač rubloŭ.

Razhledzieŭšy materyjały spravy, sud pryjšoŭ da vysnovy, što padzieńnie adbyłosia mienavita z-za nieaściarožnych dziejańniaŭ padletka, jaki schapiŭ znajomaha za šyju. U vyniku było pryniata rašeńnie spahnać ź jaho na karyść dziaŭčyny 7 tysiač rubloŭ kampiensacyi maralnaj škody, a pry adsutnaści dachodaŭ u jaho samoha — ź jahonych zakonnych pradstaŭnikoŭ.

Kamientary da artykuła