Panoŭ, dy nie toj. U rasijskim pasolstvie na Kipry znajšli miortvym nie taho čałavieka, pra jakoha kazali raniej
Jak stała viadoma resursam «VČK OHPU» i Rucriminal.info, u pasolstvie Rasii na Kipry byŭ znojdzieny miortvym supracoŭnik Słužby źniešniaj raźviedki (SZR) Anton Panoŭ, jaki pracavaŭ kryptohrafam dypłamatyčnaj misii. U toj ža čas treci sakratar pasolstva RF Alaksiej Panoŭ, jakoha «pachavali» raniej, prynamsi ŭčora ŭviečary byŭ žyvy i zdarovy.
Pasolstva Rasii na Kipry
Pavodle źviestak «VČK-OHPU», mienavita cieła Antona Panova biez prykmiet žyćcia było znojdziena na terytoryi dypmisii. Supracoŭniki pasolstva nie dapuścili tudy miascovyja siłavyja struktury. Miarkujecca, što kryptohraf moh skončyć žyćcio samahubstvam.
U saviecki čas Panoŭ vučyŭsia ŭ škole pry hrupie savieckich vojskaŭ u Hiermanii, paśla — u licei dla adoranych dziaciej z mocnym fizika-matematyčnym uchiłam. Dalej u jaho bijahrafii nazirajucca značnyja prabieły, i znoŭ jon źjaŭlajecca, pavodle ŭciečak, užo jak supracoŭnik NTC «Atłas», jaki absłuhoŭvaje śpiecsłužby i śpiecyjalizujecca na raspracoŭkach u śfiery kampjutarnaj biaśpieki i kryptahrafii. Nastupnym miescam pracy stała MZS Rasii. Adnak tyja ž uciečki śviedčać pra ciesnuju suviaź Panova ź jaho realnym miescam słužby — v/č 33949, što adpaviadaje Słužbie źniešniaj raźviedki.
Zhodna z publikacyjami jaho svajakoŭ u sacyjalnych sietkach, uzimku 2025 hoda Anton Panoŭ adpačyvaŭ u Sočy na Krasnaj Palanie, letam byŭ ź siamjoj u Maskvie, a ŭ «aksamitny siezon» užo znachodziŭsia na Kipry. Novy hod jon razam z žonkaj Natallaj (pavodle ŭciečak, raniej jana pracavała ŭ hateli «Prezident») sustreli ŭ Nikasii.
Pavodle ŭskosnych źviestak, Anton Panoŭ byŭ zaŭziatym hulniamanam i pastajanna rabiŭ staŭki na spartyŭnyja padziei.