Na Kipry źnik Uładzisłaŭ Baŭmhiertnier, były hiendyrektar «Urałkalija». Jaho zatrymlivali pa skandalnaj spravie ŭ Minsku
Mužčynu šukajuć z 7 studzienia.
Na Kipry źnik Uładzisłaŭ Baŭmhiertnier. 53‑hadovy mužčyna adsutničaje pa miescy žycharstva ŭ Limasole z 7 studzienia, paviedamlaje palicyja Kipra.
Baŭmhiertnier raniej byŭ hiendyrektaram «Urałkalija».
Kali ŭ 2013 hodzie jon prylacieŭ u Biełaruś pa zaprašeńni tahačasnaha premjer-ministra Michaiła Miaśnikoviča, jaho aryštavali. Trymali ŭ SIZA KDB.
Jaho aryštu papiaredničaŭ biełaruska-rasijski kalijny kanflikt, jaki pačaŭsia paśla taho, jak «Urałkalij» abviaściŭ pra spynieńnie prodažaŭ praz sumiesnaje ź Biełaruśsiu ZAT «Biełaruskaja kalijnaja kampanija». Praz hetaha trejdara ažyćciaŭlali prodažy i «Urałkalij», i dziaržpradpryjemstva «Biełaruśkalij». Pry hetym abodva baki abvinavačvali adzin adnaho ŭ niaŭzhodnienych prodažach u abchod BKK.
Pieršapačatkova Baŭmhiertniera abvinavacili va złoŭžyvańni ŭładaj i słužbovymi paŭnamoctvami, zatym abvinavačvańnie było dapoŭniena kradziažom. Paśla biznesmiena departavali ŭ Rasiju, dzie ŭ dačynieńni da jaho taksama była raspačata kryminalnaja sprava. Paźniej spravu zakryli «ŭ suviazi z adsutnaściu ŭ jaho dziejańniach składu złačynstva».
U 2015‑2017 hadach Baŭmhiertnier pracavaŭ na pasadzie hiendyrektara partovaj kampanii Global Ports. Paśla ŭznačalvaŭ šviejcarskuju kampaniju Alevo.