FIFA damoviłasia pra partniorstva z tyktokam padčas ČS-2026

Mižnarodnaja fiederacyja futbołu (FIFA) paviedamiła, što zaklučyła partniorskaje pahadnieńnie z płatformaj TikTok dla aśviatleńnia Čempijanatu śvietu pa futbole 2026 hoda. Pra heta raskazali ŭ pres-słužbie arhanizacyi.

Fota: FIFA

TikTok stanie pieršaj u historyi FIFA tak zvanaj «pryjarytetnaj płatformaj». Heta aznačaje bolš ciesnaje supracoŭnictva i hłybokuju intehracyju, dziakujučy čamu płatforma zmoža prapanoŭvać šyrejšaje i bolš raznastajnaje aśviatleńnie turniru. Siarod inšaha, havorka idzie pra pavieličeńnie kolkaści ŭnikalnaha kantentu i stvareńnie asnoŭnaj prastory dla zaŭziataraŭ i aŭtaraŭ na praciahu ŭsiaho mundyjalu.

Pahadnieńnie budzie dziejničać da kanca 2026 hoda. Jano praduhledžvaje mahčymaść pakazu frahmientaŭ matčaŭ u žyvym efiry, publikacyju videarolikaŭ, a taksama dostup da ekskluziŭnych materyjałaŭ, padrychtavanych FIFA śpiecyjalna dla TikTok.

Akramia taho, teleradyjokampanii zmohuć zarablać na tranślacyjach čempijanatu z dapamohaj premijalnych rekłamnych instrumientaŭ TikTok. Płatforma taksama ŭviadzie miery pa baraćbie ź piractvam, kab abaranić intelektualnuju ŭłasnaść FIFA.

Dla ČS-2026 płanujecca zapusk śpiecyjalnaha interaktyŭnaha chaba na bazie TikTok GamePlan. U im buduć sabranyja tematyčnyja videa, infarmacyja pra kvitki, prahlady matčaŭ, a taksama roznyja elemienty dla ŭzajemadziejańnia z karystalnikami — unikalnyja nalepki, filtry i hulniavyja funkcyi.

Kamientary da artykuła