Nazvali imiony dvuch recydyvistaŭ, jakija presujuć viaźniaŭ u hrodzienskaj turmie

Adzin ź ich siadzić za raspravu nad piensijanierkami na chutary, druhi — za hrupavoje zabojstva.

Złačyncy-kryminalniki Alaksandr Valter (źleva) i Dźmitryj Kryvašejeŭ. Skryn videa: PartizanWave / YouTube

«Pres-chaty» — heta zakrytyja kamiery, dzie da viaźniaŭ, kab złamać ich volu, administracyja naŭmysna padsadžvaje pravieranych kryminalnikaŭ.

Z dapamohaj infarmacyi ad byłych palitviaźniaŭ udałosia daviedacca imiony tych, chto byŭ presaŭščykami ŭ hrodzienskaj turmie №1. Videa pra ich vyjšła na jutub-kanale «Partyzanskaja chvala». Źviestkami pra mužčyn padzialilisia taksama «Kibierpartyzany».

Pieršy ź ich — Valter Alaksandr Alaksandravič, 1990 hoda naradžeńnia. U krasaviku 2010 hoda 19‑hadovy Valtar razam z 41‑hadovym paplečnikam ździejśniŭ adno z hučnych złačynstvaŭ taho času ŭ Słonimskim rajonie. U vioscy Zabulle jany napali na chutar, dzie žyli dźvie pažyłyja siastry — 78 i 75 hadoŭ.

Dziela hrošaj Valter razam z suŭdzielnikam nanieśli im množnyja kołatyja rany ŭ tvar, šyju i hrudzi. Abiedźvie žančyny pamierli na miescy ad atrymanych ran. 

Jak śćviardžajecca ŭ rasśledavańni, padčas adbyćcia pakarańnia ŭ kałonii ŭ Navasadach Valter straciŭ svoj kryminalny status i apynuŭsia ŭ najnižejšym sasłoŭi źniavolenych. Mienavita hety momant zrabiŭ jaho idealnym instrumientam dla apieratyŭnych supracoŭnikaŭ MUS. Uzamien za pracu ŭ «pres-chatach» mužčyna atrymlivaje harantyi biaśpieki i drobnyja bytavyja pryvilei, jakija niedastupnyja zvyčajnym źniavolenym.

Druhi vykanaŭca zadańniaŭ administracyi ŭ «pres-chacie» — Dźmitryj Michajłavič Kryvašejeŭ, 1982 hoda naradžeńnia. Kryminalnaja historyja uradženca Žłobina pačałasia va ŭzroście 18 hadoŭ. Kryvašejeŭ doŭhi čas byŭ biazdomnym i mieŭ ceły šlejf sudzimaściaŭ za kradziažy, rabavańni i chulihanstva.

Upieršyniu Kryvašejeŭ byŭ asudžany ŭ 2000 hodzie sudom Žłobinskaha rajona — tady jamu pryznačyli 1 hod i 6 miesiacaŭ vypraŭlenčych rabot. Nieŭzabavie paśla adbyćcia pakarańnia, u kastryčniku 2003 hoda, jon znoŭ apynuŭsia na łavie padsudnych: sud Buda-Kašaloŭskaha rajona prysudziŭ jamu dva hady abmiežavańnia voli za kradziež. Adnak užo ŭ studzieni 2004 hoda za chulihanstva Kryvašejeŭ atrymaŭ 2 hady i 3 miesiacy pazbaŭleńnia voli. U tym ža hodzie jon trapiŭ pad amnistyju i ŭ śniežni byŭ vyzvaleny ŭmoŭna-daterminova.

Na svabodzie recydyvist prabyŭ niadoŭha: u krasaviku nastupnaha hoda jon znoŭ trapiŭ u kałoniju strohaha režymu za čarhovy kradziež. Paśla čarhovaha vyzvaleńnia, u pieryjad z sakavika pa lipień 2009 hoda, Kryvašejeŭ ździejśniŭ šerah kradziažoŭ i rabavańnie, za što atrymaŭ 3 hady i 6 miesiacaŭ źniavoleńnia. Ale na voli paśla vyzvaleńnia znoŭ prabyŭ niadoŭha. U kastryčniku 2012 hoda sud Frunzienskaha rajona Minska prysudziŭ jamu 2 hady strohaha režymu za kradziež.

Kančatkovaj kropkaj staŭ vierasień 2016 hoda: Dźmitryja Kryvašejeva pryznali vinavatym u hrupavym zabojstvie, učynienym z asablivaj žorstkaściu. Jamu było pryznačana pakarańnie ŭ vyhladzie 16 hadoŭ pazbaŭleńnia voli ŭ kałonii strohaha režymu, a taksama prymusovaje lačeńnie ad ałkahalizmu.

Abodva mužčyny, jak śćviardžajecca, pracujuć pad kuratarstvam supracoŭnikaŭ apieratyŭnaha adździeła turmy №1 — Alaksieja Tarana, Siarhieja Syravatkina i Ihara Jakubieni.

Kamientary da artykuła