Prezident Kałumbii zajaviŭ, što budzie baranicca sa zbrojaj u rukach ad ZŠA
«Siabry nie bambiać», — adznačyŭ prezident Kałumbii.
Hustava Pietra ŭ svoj čas byŭ adnym z kiraŭnikom levaradykalnaj partyzanskaj hrupoŭki i byŭ aryštavany za nielehalnaje vałodańnie zbrojaj. Fota: Florence Lo — Pool / Getty Images
Prezident Kałumbii Hustava Pietra paabiacaŭ «uziać u ruki zbroju» paśla pahroz z boku ŭładaŭ ZŠA i zachopu vieniesuelskaha lidara Nikałasa Madura. Pra heta jon napisaŭ na svajoj staroncy ŭ X.
«ZŠA — pieršaja kraina ŭ śviecie, jakaja za ŭsiu historyju čałaviectva bambiła stalicu Paŭdniovaj Amieryki. Navat Nietańjachu, Hitler, Franka ci Sałazar hetaha nie rabili, — napisaŭ jon. — Kanstytucyja abaviazvaje ŭzbrojenyja siły abaraniać dziaržaŭny suvierenitet. Choć ja nie byŭ sałdatam, ja viedaju pra vajnu i tajnyja apieracyi. Ja prysiahnuŭ nikoli bolš nie brać u ruki zbroju paśla mirnaha pahadnieńnia 1989 hoda, ale dziela nacyi ja znoŭ vaźmusia za zbroju, navat kali mnie heta nie spatrebicca», — skazaŭ jon.
Pietra padkreśliŭ, što nie źjaŭlajecca nielehalnym imihrantam i nie zajmajecca narkatrafikam; u jaho ŭłasnaści — tolki adzin dom, a ŭsie dachody byli abnarodavanyja. Pavodle jaho słoŭ, Łacinskaja Amieryka pavinna abjadnacca, «inakš da jaje buduć stavicca jak da słuhi i raba, a nie jak da žyćciova važnaha centra śvietu».
«Siabry nie bambiać», — adznačyŭ Pietra.
Učora Donald Tramp vykazaŭsia nakont Kałumbii:
«Kałumbija taksama vielmi chvoraja. Joj kiruje chvory čałaviek, jaki lubić vyrablać kakain i pradavać jaho Złučanym Štatam, i jon nie zmoža doŭha hetym zajmacca», — skazaŭ jon.
U adkaz na pytańnie, ci budzie apieracyja ZŠA suprać Kałumbii, Tramp zajaviŭ, što heta zdajecca jamu «dobrym varyjantam».
Čytajcie taksama:
«Dapuściŭ roskvit narkakartelaŭ». ZŠA ŭviali sankcyi suprać prezidenta Kałumbii Hustava Pietra