Što budzie ŭ Vieniesuele dalej? Try scenaryi

Pavodle Kanstytucyi Vieniesueły, ułada pavinna pierajści da vice-prezidenta Nikałasa Madury — Dełsi Radryhies. Adnak vieniesuelskaja apazicyja moža pasprabavać skarystacca hetym momantam.

Prychilniki ŭrada vyviešvajuć płakaty z vyjavaj prezidenta Vieniesueły Nikałasa Madury i byłoha prezidenta Uha Čaviesa ŭ centry Karakasa paśla taho, jak prezident ZŠA Donald Tramp abviaściŭ, što Madura byŭ schopleny i vyviezieny samalotam z krainy. 3 studzienia 2026 hoda. Fota: AP Photo/Matias Delacroix

CNN apisvaje try mahčymyja scenary.

Pieršy — farmalna kanstytucyjny. U vypadku taho, što nazyvajecca «absalutnaj adsutnaściu» prezidenta, vice-prezidentka — Dełsi Radryhies — biare na siabie kiravańnie i pryznačaje vybary na praciahu 30 dzion. Novaabrany prezident paśla hetaha zajmaje pasadu na poŭny šaścihadovy termin.

Druhi scenar — krach režymu, pry jakim klučavyja asoby režymu sychodziać u adstaŭku abo ŭciakajuć. Najbolš imaviernym kandydatam ad apazicyi ličycca Edmunda Hansales Urucija, jaki ŭdzielničaŭ u vybarach 2024 hoda. Hansales, navukoviec i šmathadovy dypłamat, ciapier znachodzicca ŭ vyhnańni ŭ Ispanii. Jaho padtrymlivaje niadaŭniaja łaŭreatka Nobieleŭskaj premii miru, demakratyčnaja aktyvistka Maryja Karyna Mačada. Vystupajučy ŭ Osła paśla atrymańnia premii, Mačada zajaviła, što jaje ruch rychtujecca da «ŭparadkavanaha i mirnaha pierachodu», jak tolki Madura sydzie. U śniežni jana adznačyła, što Hansales zaprasiŭ jaje stać vice-prezidentam i što «pieravažnaja bolšaść» palicyi i ŭzbrojenych sił budzie vykonvać zahady novaj administracyi, jak tolki pačniecca palityčny tranzit.

Treci scenar — vajskovy zachop ułady. Ciapierašni ministr abarony Uładzimir Padryna Łopies, jaki vystupiŭ paśla ŭdaraŭ ZŠA, zajaviŭ, što Vieniesueła budzie supraciŭlacca prysutnaści zamiežnych vojsk u krainie. «Hetaje ŭvarvańnie — najvialikšaja źniavaha, jakuju kali-niebudź ciarpieła kraina», — dadaŭ jon.

Kamientary da artykuła