Karakas za 30 chvilin. ZŠA zachapili Maduru ź jaho žonkaj i vyvieźli ich ź Vieniesueły
Apieracyja supravadžałasia ŭdarami pa ŭstanoŭkach SPA Vieniesueły i vajskovych abjektach.
«Złučanyja Štaty Amieryki paśpiachova praviali maštabny ŭdar pa Vieniesuele i jaje lidarach. Prezident Madura razam sa svajoj žonkaj byŭ zatrymany i vyviezieny z krainy. Apieracyja była praviedziena ŭ kaardynacyi z pravaachoŭnymi orhanami ZŠA. Padrabiaznaści buduć paviedamlenyja paźniej. Siońnia ab 11‑j hadzinie ranicy ŭ Mar-a-Łaha adbudziecca pres-kanfierencyja», — napisaŭ Tramp u sacsietkach.
Jak paviedamlaje CBS News, Madura byŭ zachopleny elitnym padraździaleńniem śpiecyjalnaha pryznačeńnia «Delta». Apieracyja supravadžałasia ŭdarami pa ŭstanoŭkach SPA Vieniesueły i vajskovych abjektach.
Paźniej CNN paviedamiła, što Maduru z žonkaj schapili prosta ŭ spalni. «Paru zachapili siarod nočy, kali jany spali», — kažuć krynicy vydańnia.
63‑hadovy Nikałas Madura ŭznačalvaŭ Vieniesuełu z 2013 hoda. Zachad nie pryznavaŭ vyniki vybaraŭ, zhodna ź jakimi jon pieraabiraŭsia na novyja terminy.