Novym kiraŭnikom ukrainskaj raźviedki staŭ Aleh Ivaščanka. Što pra jaho viadoma?
Prezident Ukrainy Uładzimir Zialenski abviaściŭ pra klučavuju kadravuju źmienu ŭ siłavym błoku krainy. Paśla pierachodu Kiryła Budanava na pasadu kiraŭnika Ofisa prezidenta, Hałoŭnaje ŭpraŭleńnie raźviedki (HUR) uznačaliŭ hienierał-lejtenant Aleh Ivaščanka, jaki da hetaha byŭ kiraŭnikom Słužby źniešniaj raźviedki.
Prezident Ukrainy Uładzimir Zialenski i novy kiraŭnik HUR Aleh Ivaščanka
Hetaje pryznačeńnie zaviaršyła łancužok pierastanovak va ŭkrainskaj uładzie, jaki pačaŭsia sa zvalnieńnia papiaredniaha kiraŭnika Ofisa prezidenta Andreja Jarmaka i pryznačeńnia na jaho miesca Kiryła Budanava. Ciapier adna z samych upłyvovych śpiecsłužbaŭ krainy atrymała novaha kiraŭnika.
Chto taki Aleh Ivaščanka?
56‑hadovy Aleh Ivaščanka — kadravy vajenny raźviedčyk ź vialikim dośviedam, jaki prajšoŭ usie prystupki karjernaj leśvicy. U adroźnieńnie ad svajho papiarednika, jon źjaŭlajecca mienš publičnaj, ale vielmi ŭpłyvovaj fihuraj u siłavych strukturach.
Jon skončyŭ Kijeŭskaje vyšejšaje ahulnavajskovaje kamandnaje vučylišča, Nacyjanalnuju akademiju abarony, a taksama atrymaŭ stupień u halinie ekanomiki i prava. Taksama Ivaščanka maje navukovuju stupień kandydata vajennych navuk.
Z 2017 hoda zajmaŭ pasadu pieršaha namieśnika načalnika HUR i adnačasova namieśnika načalnika Hienštaba pa raźviedcy. Faktyčna, jon byŭ «pravaj rukoj» kiraŭnikoŭ raźviedki na praciahu mnohich hadoŭ.
Z 2021 hoda byŭ pamočnikam Hałoŭnakamandujučaha Uzbrojenych sił Ukrainy. U sakaviku 2024 hoda byŭ pryznačany kiraŭnikom Słužby źniešniaj raźviedki Ukrainy.
Takim čynam, Ivaščanka vydatna znajomy sa śpiecyfikaj pracy jak vajennaj, tak i źniešniaj raźviedki. Jon źjaŭlajecca členam Staŭki Viarchoŭnaha Hałoŭnakamandujučaha i Savieta nacyjanalnaj biaśpieki i abarony Ukrainy. Za svaju słužbu ŭznaharodžany prestyžnymi ordenami Bahdana Chmialnickaha i Daniły Halickaha.
Pryznačeńnie Aleha Ivaščanki śviedčyć pra toje, što prezident Zialenski zrabiŭ staŭku na daśviedčanaha prafiesijanała, jaki dobra viedaje sistemu znutry i zdolny zabiaśpiečyć bieśpierapynnaść i efiektyŭnaść pracy vajennaj raźviedki va ŭmovach vajny.