Va Ukrainie abviaścili ŭ vyšuk błohiera, jaki niekalki hadoŭ tamu ŭciok u Minsk
Va Ukrainie abjavili ŭ mižnarodny vyšuk uradženca Lvoŭskaj vobłaści Uładzimira Šaramietu-Pańčaka i zavočna jaho aryštavali, paviedamlaje «Radyjo Svaboda».
Uładzimir Pańčak-Šaramieta. Fota: BiełTA
Šaramietu-Pańčaku vystavili padazreńni ŭ dziaržaŭnaj zdradzie i ŭ apraŭdańni ŭzbrojenaj ahresii Rasii suprać Ukrainy. Spravu pačali jašče 27 lipienia 2023 hoda. Pa zakonie jamu pahražaje ad 5 hadoŭ da pažyćciovaha źniavoleńnia z kanfiskacyjaj majomaści.
U apošnija hady Šaramieta-Pańčak udzielničaŭ u videaprajektach biełaruskaha dziaržaŭnaha infarmacyjnaha ahienctva BiełTA, dzie raspaŭsiudžvaŭ antyzachodnija i antyŭkrainskija materyjały. Raniej BiełTA pradstaŭlała jaho jak pradprymalnika, jaki bolš za 20 hadoŭ žyŭ u Łondanie.
Pavodle infarmacyi ŭkrainskich śledčych, Šaramieta-Pańčak źjechaŭ z Ukrainy ŭ Polšču ŭ 2022 hodzie paśla pačatku poŭnamaštabnaj vajny, a potym pierabraŭsia ŭ Minsk. Tam z krasavika pa žnivień 2024 hoda jon udzielničaŭ u zapisach dla YouTube-kanała BiełTA, pradstaŭlajučysia jak Uładzimir Pańčak.
U lutym 2025 hoda paviedamlałasia, što hety dziejač byŭ zatrymany ŭ Biełarusi pa artykule ab raspalvańni varožaści abo za niezakonnaje vykarystańnie dronaŭ. Ciapier, adnak, Šaramieta-Pańčak znachodzicca ŭ Minsku na voli i aktyŭna viadzie svaje sacyjalnyja sietki ŭ TikTok, Instagram i Telegram, pieravažna pa-ŭkrainsku.
U lipieni 2024 hoda ŭkrainski centr «Miratvorac» uklučyŭ jaho ŭ svaju bazu za dziejnaść, nakiravanuju na padryŭ suvierenitetu i abaronazdolnaści Ukrainy, dyskredytacyju siłavych struktur, pieraškody zakonnaj dziejnaści Uzbrojenych sił, a taksama destabilizacyju hramadska-palityčnaha žyćcia.