Załužny płanuje pakinuć pasadu pasła Ukrainy ŭ studzieni i viarnucca ŭ Kijeŭ
Eks-hałoŭnakamandujučy USU Valer Załužny płanuje pakinuć pasadu pasła ŭ Vialikabrytanii studzieni. Pra heta ŭkrainskaje vydańnie Nv.ua paviedamlaje sa spasyłkaj na čatyry krynicy ŭ palityčnych i dypłamatyčnych kołach.
Fota: Finnbarr Webster Getty Images
Pavodle słoŭ surazmoŭcaŭ, blizkich da Ofisa prezidenta Ukrainy, były hałoŭnakamandujučy Uzbrojenych sił Ukrainy paviedamiŭ pra heta Zialenskamu jašče niekalki tydniaŭ tamu.
— Jany z prezidentam abmiarkoŭvali roznyja pasady dla Załužnaha — ad premjer-ministra da kiraŭnika Ofisa prezidenta, ale na toj momant jon zacikaŭlenaści nie prajaviŭ, — adznačajuć krynicy vydańnia.
Pavodle słoŭ inšych krynic, peŭny čas Załužny navat razvažaŭ pra pasadu pasła ŭ ZŠA abo hałoŭnakamandujučaha Uzbrojenych sił Ukrainy, ale na dadzieny momant rašeńniaŭ nakont hetaha niama. Pra źmienu pasła ŭ ZŠA ciapier havorka nie idzie, kažuć surazmoŭcy.
Surazmoŭcy NV nie vyklučajuć, što Załužny moža viarnucca ŭ Kijeŭ i abviaścić pra svajo rašeńnie 4—5 studzienia, kali «ničoha nie paŭpłyvaje na jaho rašeńnie».
Valeryj Załužny byŭ zvolnieny z pasady hałoŭnakamandujučaha Uzbrojenych sił Ukrainy ŭ lutym 2024 hoda. Praź niekalki miesiacaŭ jon byŭ pryznačany pasłom Ukrainy ŭ Vialikabrytanii.