Tramp: Niaŭzhodnienymi zastajucca adno-dva najbolš składanyja pytańni pahadnieńnia pa Ukrainie

Prezidenty ZŠA i Ukrainy Donald Tramp i Uładzimir Zialenski dali sumiesnuju pres-kanfierencyi paśla pieramovaŭ u rezidencyi Trampa Mar-a-Łaha. Padčas hetych pieramoŭ nibyta ŭdałosia vyrašyć ledź nie ŭsie pytańni, aprača najbolš istotnych, najpierš terytaryjalnych.

Uładzimir Zialenski i Donald Tramp na pres-kanfierencyi 28 śniežnia 2025 hoda. Fota: AP Photo/Alex Brandon

Tramp praviedzienuju sustreču ź Zialenskim acaniŭ vielmi vysoka i ličyć jaje, razam z razmovaj z Pucinym, jakaja adbyłasia raniej, nadzvyčaj praduktyŭnaj:

«U nas była cudoŭnaja sustreča. My abmierkavali mnostva pytańniaŭ. Jak vy viedajecie, u mianie była vydatnaja telefonnaja razmova z prezidentam Pucinym, jakaja doŭžyłasia bolš za dźvie hadziny. My abmierkavali šmat punktaŭ, i ja sapraŭdy liču, što my značna nablizilisia, mahčyma, vielmi blizka. Naša sustreča była vydatnaj. My achapili, chtości skazaŭ by, 95 adsotkaŭ. Ja nie viedaju, jaki mienavita pracent, ale my damahlisia vialikaha prahresu ŭ pytańni zakančeńnia toj vajny, jakaja źjaŭlajecca, biezumoŭna, samaj śmiertanosnaj vajnoj z časoŭ Druhoj suśvietnaj vajny, vierahodna, samaj bujnoj vajnoj z časoŭ Druhoj suśvietnaj vajny».

Jon nie viedaje, ci budzie vajna narešcie zavieršana, «ale my, biezumoŭna, vielmi blizka». 

Uładzimir Zialenski zajaviŭ, što Ukraina i ZŠA zaviaršyli ŭzhadnieńnie šerahu dakumientaŭ u ramkach mirnaha pakieta. Jon patłumačyŭ, što ciapier uzhodnienyja, u pryvatnaści, amierykanskija harantyi biaśpieki.

« 20‑punktavy płan uzhodnieny na 90%, harantyi biaśpieki ZŠA — na 100%, supolnyja harantyi biaśpieki ZŠA i ES dla Ukrainy — amal uzhodnienyja, pry hetym vajskovaje vymiareńnie (hetych harantyj) uzhodnienaje na 100%», — zajaviŭ Zialenski.

Taksama, pa słovach ukrainskaha prezidenta, jość dakumienty, praca nad jakimi praciahvajecca.

«Płan roskvitu Ukrainy ciapier finalizujecca, i taksama ciapier my abmiarkoŭvajem paśladoŭnaść dziejańniaŭ», — zajaviŭ jon.

Zialenski zajaviŭ, što padčas pieramoŭ havaryli i pra refierendum, jaki mohuć vykarystoŭvać u ramkach mirnaha płana. Pavodle jaho słoŭ, kali mirny płan budzie składanym dla ŭkrainskaha hramadstva, to hramadstva pavinna prahałasavać.

«Vierahodna, mirny płan treba budzie zaćvierdzić u parłamiencie abo na refierendumie. Viedajecie, było apytańnie, i 91% vystupiŭ za zaviaršeńnie hetaj vajny», — skazaŭ u svaju čarhu Tramp i padkreśliŭ, što dla ŭkrainskaha hramadstva heta balučaje pytańnie, bo havorka idzie pra ŭłasnuju ziamlu.

Prezident ZŠA taksama pryznaŭ, što na pieramovach pa spynieńni vajny va Ukrainie «zastajucca adno-dva składanyja niavyrašanyja pytańni». Adnym ź ich źjaŭlajecca terytaryjalnaje pytańnie, datyčnaje Danbasa. Praŭda, i tut u jaho jość padstavy dla aptymizmu.

«Ja dumaju, my bližej, čym byli raniej — jano pakul nie vyrašanaje, ale my značna nablizilisia», — skazaŭ prezident ZŠA.

Pytańnie pa Zaparožskaj atamnaj elektrastancyi taksama abmiarkoŭvałasia, ale pakul nie vyrašana, paviedamiŭ Tramp:

«Pucin pracuje z Ukrainaj, kab zapuścić Zaparožskuju AES, jon choča bačyć jaje ŭviadzieńnie ŭ ekspłuatacyju. Jon bolš nie nacelvaje na jaje rakiet, tamu što heta było b niebiaśpiečna. Ale my pracujem».

Na dumku Trampa, pytańnie adnosna ZAES abmiarkoŭvałasia doŭha, i dadaŭ, što jana «moža być nieadkładna ŭviedziena ŭ ekspłuatacyju».

Rasija, jak upeŭnieny Tramp paśla razmovy z Pucinym, hatovaja ŭdzielničać u adnaŭleńni Ukrainy.

«Rasija — heta hučyć krychu dziŭna — Pucin vielmi ščodry na toje, kab Ukraina mahła adnavicca, jon hatovy pastaŭlać tannuju elektraenierhiju», — zajaviŭ prezident ZŠA.

U toj ža čas Pucin, pa słovach Trampa, nie zhodzien na časovaje spynieńnie ahniu dla praviadzieńnia refierendumu va Ukrainie.

«Nie na spynieńnie ahniu. I heta adno z pytańniaŭ, pra jakija my zaraz havorym. Kali im pryjdziecca pačać [vajavać] znoŭku, jon nie choča apynucca ŭ takim stanoviščy. Ja razumieju jaho pazicyju», — zajaviŭ prezident ZŠA.

Pytańnie ab «svabodnaj ekanamičnaj zonie» ŭ Danbasie taksama pakul nie vyrašana.

«Słova «vyrašana» zanadta mocnaje, my pakul nie raźviazali heta pytańnie, ale my nablizilisia da rašeńnia, užo vielmi chutka», — skazaŭ Tramp.

Abodva prezidenty zajavili, što pieramovy buduć praciahvacca i dalej. Tramp paviedamiŭ, što praviadzie novuju razmovu ź Zialenskim u paniadziełak:

«My budziem havaryć na praciahu nastupnych niekalkich tydniaŭ. My, napeŭna, budziem šmat havaryć, ale pahavorym zaŭtra». 

«My damovilisia što kamandy buduć sustrakacca ŭ najbližejšyja tydni, i prezident Tramp pahadziŭsia pryniać nas u studzieni, jak miarkujecca, u Vašynhtonie», — paćvierdziŭ takija namiery Zialenski.

Tramp ža ličyć, što kali ŭsio dalej pojdzie dobra, to miru možna budzie damahčysia za niekalki tydniaŭ.

«Ja nie viedaju kali, ale my heta zrobim, — zajaviŭ jon. — Rasieja chacieła b, kab heta skončyłasia. Ukraina chacieła b, kab heta skončyłasia. I ja dumaju, pryjšoŭ čas heta skončyć».

Kamientary da artykuła