Novy staršynia Kanstytucyjnaha suda adpraviŭ syna vučycca na raźviedčyka ŭ akademiju HRU. A jak pačałasia vajna, chutčej zabraŭ z Rasii

Staršynioj Kanstytucyjnaha suda pryznačany 52‑hadovy juryst Siarhiej Siviec. U sud jon pierasieŭ z prezidyuma Savieta Respubliki. Raskazvajem, jakija tajamnicy jość u siamji novaha sudździ.

Siarhiej Siviec. Fota: sb.by

Siarhiej Siviec naradziŭsia ŭ 1973 hodzie ŭ Minsku ŭ siamji supracoŭnika biełaruska-polskaha pradpryjemstva «Bokiemin», jakoje zajmałasia procipažarnymi sistemami, i načalnicy łabaratoryi BDU. Pa infarmacyi «Biełpoła», baćku Siarhieja ŭ 1992 hodzie asudzili za kradziež dziaržaŭnaj majomaści. Siadzieŭ u mahiloŭskaj kałonii №15, vyzvaleny ŭ 1997 hodzie pa amnistyi.

Sam Siarhiej Siviec doŭhi čas pracavaŭ u BDU, paśla kiravaŭ Instytutam pravavych daśledavańniaŭ Nacyjanalnaha centra zakanadaŭstva i pravavych daśledavańniaŭ. U Saviet Respubliki jaho ŭziali jak śpiecyjalista pa jurysprudencyi. Spačatku Siviec uznačaliŭ kamisiju pa zakanadaŭstvie i dziaržaŭnym budaŭnictvie. Što admietna, u nastupnaje sklikańnie hetu kamisiju addali ahrarniku Rusamu, a Siviec staŭ kiravać nie nadta profilnaj dla siabie kamisijaj pa adukacyi, navucy, kultury i sacyjalnym raźvićci. Taksama jon uvachodzić u prezidyum partyi «Biełaja Ruś».

Žonka — u Saviecie Respubliki, syn — u akademii HRU

Žonka Siŭca Volha Ivaščanka zastajecca pracavać u Saviecie Respubliki. A syn Alaksandr, vypusknik 174‑j minskaj himnazii, sa zhody baćki pajechaŭ vučycca ŭ Maskvu ŭ akademiju HRU, dzie rychtujuć vajskovych raźviedčykaŭ.

Tudy prosta tak (tym bolš nie hramadzian Rasii) nie biaruć, tolki zaprašajuć Kažuć, Siviec-starejšy mocna pastaraŭsia, kab syna zaprasili ŭ akademiju. 

Žonka Siarhieja Siŭca — Volha Ivaščanka — pačynała svaju karjeru na pasadzie nataryusa Hałoŭnaha ŭpraŭleńnia justycyi Minharvykankama. Z 2008 hoda — hałoŭny śpiecyjalist sakrataryjata Savieta Respubliki. Adkazvaje za arhanizacyjnuju i ideałahičnuju pracu. Fota: pac.by

Pazicyju Siarhieja Siŭca apisvajuć tak — jon za suvierenitet Biełarusi, ale z harantyjami Rasii. I adpraŭku syna ŭ Maskvu ličać łahičnym dla jaho krokam.

Inšyja krynicy adznačajuć, što z prychodam vajny Siviec-starejšy chutka evakujavaŭ syna dadomu, bo spužaŭsia, što taho adpraviać na vajnu padčas mabilizacyi.

Kab pierastrachavacca, Alaksandru — jakoha jašče niadaŭna rychtavali ŭ vajskovyja raźviedčyki — na radzimie zrabili daviedku ab nieprydatnaści słužby ŭ vojsku.

Fota: vokładka staronki Siarhieja Siŭca na staroncy fejsbuka.

«Jon nie łajalny Łukašenku, jon hulaje za siabie»

Pry pryznačeńni Siŭca Łukašenka padkreśliŭ jaho viernaść u 2020 hodzie:

«Što tut hrachu ŭtojvać: 2020 hod — heta pakazčyk. Chto jak prajšoŭ hety etap, pra šmat što kaža. Tut taksama da vas pretenzij absalutna niama».

U 2020 hodzie mienavita Siviec uziaŭ na siabie inicyjatyvu i prapanavaŭ štrafavać za kožny bieł-čyrvona-bieły ściah na 135 rubloŭ. Pryčym heta byŭ jašče kaniec vieraśnia, kali praciahvalisia aktyŭnyja pratesty.

Biezumoŭnaja łajalnaść uładam z taho času — hałoŭny aryjencir pry pracaŭładkavańni ŭ siońniašniaj Biełarusi. Znajomy novaha staršyni Kanstytucyjnaha suda kaža, što ŭ 2020‑m Siviec byŭ upeŭnieny ŭ tym, što siłaviki maksimalna padrychtavanyja da pratestaŭ i abaroniać režym pry lubych scenarach.

Ale jaho žonku krychu pužali nastroi ludziej padčas kavidu — u siamji pryznavali, što spravy zmahańnia ź virusam iduć niadobra, i dapuskali, što mienavita heta moža razzłavać narod. U masavaść akcyj pa zakliku apazicyi nichto nie vieryŭ.

Niekatoryja nazyvajuć muža i žonku Siŭcoŭ «paračkaj šerych kardynałaŭ łukašenkaŭskaj viertykali».

Siŭca ličać chutčej karjerystam, čym addanym łukašenkaŭskaj ideałohii.

«Siviec — prahmatyčny pradukt sistemy, jaki choča dabracca na samy vierch. Jon nie łajalny Łukašenku, jon hulaje za siabie».

Ciapier Siviec adkazvaje za Kanstytucyjny sud — jon pavinien praviarać, nakolki zakanadaŭstva Biełarusi, u pryvatnaści, ukazy Alaksandra Łukašenki, adpaviadajuć Kanstytucyi.

Jaho papiarednik Piatro Mikłaševič zajmaŭ pasadu z 2008 hoda i nie zapomniŭsia ŭvohule ničym, ni razu nie ŭsumniŭšysia ŭ dziejańniach Łukašenki.

Kamientary da artykuła