Na Čarnobylskaj AES papiaredzili, što abarončy sarkafah moža nie vytrymać novaha rasijskaha ŭdaru

Dyrektar Čarnobylskaj AES Siarhiej Tarakanaŭ zajaviŭ, što novy ŭdar z boku Rasii moža pryvieści da abvału ŭnutranaha radyjacyjnaha schovišča na terytoryi stancyi. Pra heta jon paviedamiŭ u intervju ahienctvu AFP, piša France24.com.

Rabočyja likvidujuć nastupstvy rasijskaha nalotu. Skrynšot ź videa

Ukrainskija ŭłady z pačatku poŭnamaštabnaha ŭvarvańnia ŭ 2022 hodzie nieadnarazova abvinavačvali Rasiju ŭ abstrełach Čarnobylskaj zony. Raniej u hetym hodzie ŭ vyniku adnaho z udaraŭ była paškodžanaja źniešniaja abałonka achoŭnaha sarkafaha, paśla čaho MAHATE zajaviła, što kanstrukcyja straciła asnoŭnyja funkcyi biaśpieki.

Pavodle słoŭ Siarhieja Tarakanava, poŭnaje adnaŭleńnie achoŭnaha zbudavańnia moža zaniać try—čatyry hady. Jon papiaredziŭ, što navat udar rakiety abo drona pobač sa schoviščam moža vyklikać łakalnaje siejśmičnaje ŭździejańnie, jakoje pahražaje abvałam unutranaj kanstrukcyi. Asablivuju niebiaśpieku, pa jaho słovach, ujaŭlajuć balistyčnyja rakiety typu «Iskander», zdolnyja razburać umacavanyja abjekty.

Čarnobylskaja AES nakrytaja dźviuma achoŭnymi kanstrukcyjami: unutranym sarkafaham ź bietonu i stali, uźviedzienym adrazu paśla avaryi 1986 hoda, i sučasnaj źniešniaj abałonkaj — «Novym biaśpiečnym kanfajnmientam». U lutym hetaha hoda rasijski dron surjozna paškodziŭ dach źniešniaj kanstrukcyi, što pryviało da pažaru.

Tarakanaŭ adznačyŭ, što źniešni sarkafah častkova straciŭ svaje klučavyja funkcyi. Dzirku ad drona časova zakryli achoŭnym ekranam, ale zastajecca jašče kala 300 nievialikich adtulin, zroblenych padčas tušeńnia pažaru, ź jakimi taksama niešta treba rabić.

MAHATE paśla svajoj pravierki paćvierdziła, što asnoŭnyja apornyja elemienty i sistemy manitorynhu nie byli niezvarotna paškodžanyja, adnak funkcyja izalacyi radyjacyi asłablenaja. Pry hetym, pa słovach dyrektara stancyi, uzrovień radyjacyi ŭ Čarnobylskaj zonie zastajecca stabilnym i ŭ miežach normy.

U pačatku poŭnamaštabnaha ŭvarvańnia ŭ lutym 2022 hoda z terytoryi Biełarusi rasijskija vojski zachapili Čarnobylskuju AES, ale praź niekalki tydniaŭ byli vymušanyja pakinuć jaje.

Kamientary da artykuła