«Roŭna sutki bieź pierasadak». Na vyjeździe z Polščy ŭ Biełaruś — čerhi aŭtobusaŭ
Napiaredadni kaladnych śviataŭ dziasiatki aŭtobusaŭ stajać u čarzie na ŭjezd u Biełaruś z Polščy. Pasažyry pravodziać na miažy kala sutak. Znoŭ nabyła papularnaść praktyka pierasadak za dadatkovuju płatu ŭ aŭtobusy, jakija stajać napieradzie ŭ čarzie, piša Most.
Fota: Pamiežny kamitet
Jak pišuć karystalniki pamiežnych čataŭ, prachodžańnie miažy praz punkt propusku «Terespal — Brest» zajmaje kala sutak ci navat bolš.
Viktar jechaŭ z Varšavy. Jon piša, što prybyŭ na miažu 21 śniežnia a 04:50, jaho aŭtobus byŭ 56‑m u čarzie. Pasažyry pakinuli pamiežny pierachod ź biełaruskaha boku tolki 22 śniežnia a 08:30. Na polskim punkcie propusku aŭtobus aformili za 25 chvilin, a na biełaruskim baku — za čatyry z pałovaj hadziny.
U karystalnicy Vera Vanislavskaya prachodžańnie miažy bieź pierasadki zaniało 28 hadzin 15 chvilin: prybyli na miažu 21 śniežnia a 01:30, a vyjechali ź miažy 22 śniežnia a 05:15.
— Miaža RP—RB — roŭna sutki bieź pierasadak, — piša karystalnica Anžeła.
Mnohija karystalniki adznačajuć, što kantrol na vyjezd z Polščy prachodzić chutka, a biełaruskaja starana nakiroŭvaje značnuju častku transpartnych srodkaŭ na renthien.
Pierad šłahbaumam mianiajuć bus na 20 miescaŭ na vialiki aŭtobus
Razam z čerhami na miažu viarnułasia i praktyka płatnych pierasadak u pieršyja ŭ čarzie aŭtobusy. Hetym razam «padsadki» praktykujucca na polskim baku miažy. U Terespali navat źjavilisia kiroŭcy, jakija prapanujuć padvieźci pasažyraŭ aŭtobusaŭ da pačatku čarhi. Hetaja pasłuha kaštuje 20 złotych.
Za pierasadku ŭ adzin ź pieršych aŭtobusaŭ u čarzie płaciać pa 50 jeŭra. U pasažyraŭ, jakija skarystalisia takim sposabam, prachodžańnie miažy zaniało 4,5—5 hadzin.
Karystalniki čata apisali sumnieŭnuju praktyku niekatorych pieravozčykaŭ: jany spačatku staviać u čarhu bus na 20 pasažyraŭ, a pierad šłahbaumam mianiajuć jaho na 50‑miesny aŭtobus. Takim čynam pierad miažoj źjaŭlajucca dziasiatki volnych miescaŭ, jakija možna pradać pa 50 jeŭra.
Što ŭ «Babroŭnikach»
Čerhi aŭtobusaŭ źjavilisia i na pamiežnym pierachodzie «Babroŭniki — Bierastavica». U čatach pišuć, što ŭnačy z 21 na 22 śniežnia ŭ čarzie na vyjezd z Polščy ŭ Biełaruś było 24 aŭtobusy.
Prachodžańnie miažy ŭ bok Biełarusi zajmaje 24—25 hadzin.
Na vyjezd ź Biełarusi taksama čerhi
Čerhi aŭtobusaŭ jość i na biełaruskim baku miažy. U «Breście» niekatoryja pieravozčyki praktykujuć pierasadku ŭ padmiennyja aŭtobusy bližej da pačatku čarhi. Prachodžańnie miažy na aŭtobusie ŭ bok Polščy praz punkt propusku «Brest — Terespal» zajmaje blizu vaśmi hadzin.
U «Bierastavicy» prachodžańnie miažy ŭ bok Polščy zajmaje 12—14 hadzin.