«Najlepšy kaladny padarunak»: biełaruska pieramahła biurakratyju i atrymała ŭ Narviehii pašpart zamiežnika

Pryblizna hod tamu joj admovili z farmuloŭkaj kštałtu «Nie razumiejem, čamu b vam nie pajechać u Biełaruś i nie zrabić novy pašpart».

Svaim ščaściem biełaruska padzialiłasia ŭ sacsietkach. Jana kaža, što heta najlepšy padarunak na Novy hod.

Žančyna znachodzicca ŭ Narviehii pa pracoŭnaj vizie. Pryblizna hod tamu ŭ jaje dački skončyŭsia biełaruski pašpart. Sama maci nie maje mahčymaści pajechać na radzimu, kab zrabić dziciaci novy dakumient — bo dobra razumieje ryzyku trapić za kraty.

Tamu žančyna vyrašyła pasprabavać atrymać dla dački pašpart zamiežnika ŭ Narviehii.

— Matyvavała nieabchodnaść atrymać treveł dok tym, što ja znachodžusia ŭ śpisie «Viasny», była zatrymanaja ŭ 2020 hodzie. Dadała adkaz biełaruskaj ambasady ŭ Šviecyi pra toje, što pašpart možna atrymać tolki ŭ Biełarusi. Ale tady my atrymali admovu.

Biełaruska vyrašyła nie zdavacca i padała apielacyju. Jana kaža, što nie źviartałasia pa dapamohu da jurystaŭ ci advakataŭ — prosta prytrymlivałasia standartnaj pracedury, pryniataj u Narviehii.

— Paśla admovy UDI (imihracyjnaja słužba Narviehii) čałaviek moža aŭtamatyčna padać apielacyju praź jaje sajt. Apielacyju razhladaje ŭžo UNE (apielacyjnaja rada pa spravach zamiežnikaŭ). Heta niezaležny orhan, jaki praviaraje rašeńni i moža ci paćvierdzić ich, ci admianić.

I voś niadaŭna biełaruska daviedałasia, što UNE admianiła rašeńnie UDI. U matyvacyjnaj častcy było adznačana, što isnujuć asablivyja padstavy, jakija śviedčać pra nieabchodnaść vydačy zajaŭniku pašparta inšaziemca:

«Heta źviazana z abnoŭlenaj infarmacyjaj pra krainu, zhodna ź jakoj dla aryštu pry ŭjeździe ŭ Biełaruś paśla znachodžańnia za miažoj dastatkova vielmi nievialikaj kolkaści danych. Značnaja častka infarmacyi adsočvajecca biełaruskimi ŭładami i rehistrujecca ŭ bazach danych, jakija praviarajucca pry viartańni. Akramia taho, pry ŭjeździe ŭłady praviarajuć telefony, historyju pošuku, paviedamleńni i padobnaje. Jość taksama prykłady ludziej, jakija doŭhi čas pražyvali za miažoj i nieadnarazova ŭjazdžali i vyjazdžali z svajoj krainy biez prablem, ale zatym byli aryštavanyja paśla ŭjezdu».

Pašpart zamiežnika maleńkaja biełaruska ŭžo atrymała. Jaje maci ličyć, što ŭ hetym vialikaja zasłuha Ofisa Śviatłany Cichanoŭskaj:

— Bo hod tamu nam admovili z farmuloŭkaj kštałtu «Nie razumiejem, čamu b vam nie pajechać u Biełaruś i nie zrabić novy pašpart». Chacia ŭvieś kiejs byŭ akurat pra toje, čamu. A apielacyjny orhan admianiŭ rašeńnie praz hod z padrabiaznym razumieńniem realnaj palityčnaj situacyi ŭ Biełarusi i stanoviščam ludziej, jakija vyjechali za miažu.

Pytańniem, kab biełarusy ŭ Narviehii mahli atrymoŭvać pašparty zamiežnikaŭ, zajmałasia taksama Zadzinočańnie biełaruskich studentaŭ.

Kamientary da artykuła