Papularnuju tyktokierku z Łuninca, jakaja ratavała biazdomnych žyviolinaŭ, asudzili za palityku

U Aleny Chartanovič padpisčykaŭ stolki ž, kolki žycharoŭ u jaje rodnym horadzie. Žančyna viała błoh pra dapamohu žyviołam, ale niadaŭna jaje sudzili pavodle palityčnaha artykuła.

Alena Chartanovič. Fota ź jaje staronki Ukantakcie

Alenie Chartanovič 52 hady. Žančyna žyvie ŭ Łunincy razam z mužam, u pary dvoje darosłych dziaciej. Jana pracuje pradavačkaj u miascovaj kramie «Biełviest».

U sacsietkach Alena stała sapraŭdnaj miascovaj zorkaj, dziakujučy svajmu dobramu sercu. Jana viadzie papularny tyktok-akaŭnt, na jaki padpisanyja amal 24 tysiačy čałaviek.

U błohu žančyna publikavała sotni videa pra vyratavańnie biazdomnych žyviolin: jana lačyła katoŭ i sabak z vulicy, šukała im dom i dzialiłasia kranalnymi historyjami sa svaimi padpisčykami. Ahułam jaje roliki sabrali amal miljon łajkaŭ i bolš za 10 miljonaŭ prahladaŭ.

Nieviadoma, kali Alenu zatrymali. Ale niadaŭna Brescki abłasny sud pryznaŭ jaje vinavataj pavodle častak 1 i 2 artykuła 361‑4 Kryminalnaha kodeksa («spryjańnie ekstremisckaj dziejnaści»).

Čaściej za ŭsio apošnim časam pavodle hetaha artykułu sudziać za paviedamleńni ŭ telehram-bot kanała «Biełaruski Hajun». Alenie Chartanovič prysudzili chatniuju chimiju i ŭnieśli jaje ŭ «śpis ekstremistaŭ» MUS.

Kamientary da artykuła