Minpram pravioŭ «razbor palotaŭ» na biełaruskich hihantach pramysłovaści. Chvalicca asabliva niama čym

Ministerstva pramysłovaści Biełarusi karaje kiraŭnikoŭ šerahu bujnych dziaržaŭnych pradpryjemstvaŭ za toje, što jany nie vykanali płany pa eksparcie, inviestycyjach i rentabielnaści. Vydańnie «Lusterka» pry dapamozie arhanizacyi «Biełpoł» atrymała ŭnutranyja dakumienty Minprama za listapad 2025 hoda, jakija heta paćviardžajuć.

Na Minskim traktarnym zavodzie. Fota: «Naša Niva»

Z materyjałaŭ vynikaje, što ministerstva vielmi niezadavolenaje vynikami pracy kiraŭnikoŭ viadučych chołdynhaŭ. Asnoŭnaja pryčyna nakładzienych na ich spahnańniaŭ — pravał pa klučavych pakazčykach, jakija ŭrad davioŭ jašče na pačatku hoda.

Asabliva surova pakarali kiraŭnictva Minskaha traktarnaha zavoda. Hienieralnamu dyrektaru MTZ Siarhieju Aŭramienku prapanavali abjavić vymovu za niedavykanańnie płanaŭ pa eksparcie, rentabielnaści prodažaŭ i inviestycyjach u asnoŭny kapitał. U dakumiencie taksama adznačajecca, što haspadarnik niedastatkova efiektyŭna pracavaŭ nad dvuma inviestycyjnymi prajektami ŭ Rasii — u Krasnadarskim krai i Tatarstanie. U vyniku jaho i inšych słužbovych asob z kiraŭnictva MTZ pazbavili ŭsich nadbavak i premij za kastryčnik 2025 hoda.

Vymovu atrymaŭ i kiraŭnik «Mahiloŭliftmaša» Rusłan Strachar — taksama za pravalnuju pracu z ekspartam.

Šerahu inšych kiraŭnikoŭ vyniesienyja zaŭvahi. Siarod tych, kaho pakarali za zryŭ ekspartnych płanaŭ — hienieralny dyrektar BIEŁAZa Siarhiej Lesin, kiraŭnik «Biełkamunmaša» Taras Muroh i dyrektar MAZa Valeryj Ivankovič.

Asobna adznačajecca, što kiraŭnictva Minskaha matornaha zavoda (MMZ), Biełaruskaha mietałurhičnaha zavoda (BMZ) i Barysaŭskaha zavoda aŭtatraktarnaha elektraabstalavańnia (BATE) atrymała vymovy nie tolki za ekspart:

• kiraŭnik MMZ Alaksandr Batvińnik — za pravał inviestycyjnych płanaŭ;
• hiendyrektar BMZ Dźmitryj Korčyk — za prablemy z rentabielnaściu i čystaj prybytkovaściu;
• kiraŭnik BATE Alaksandr Marčanka — za praźmiernaje nazapašvańnie pradukcyi na składach.

U dadatkach da dakumientaŭ pryviedzienyja paraŭnańni pamiž płanavymi pakazčykami i realnymi vynikami za studzień—vierasień 2025 hoda. Jany śviedčać pra surjoznyja prablemy:

• «Atłant» pavinien byŭ vypuścić 225 tysiač pralnych mašyn, ale zrabiŭ tolki 89 104.
• «Haryzont» i «Viciaź» sumarna płanavali try miljony televizaraŭ, a zrabili mienš za dva.
• MTZ pavinien byŭ vypuścić 33 767 traktaroŭ, ale zrabiŭ 26 260; pa eksparcie pravał jašče bolšy — zamiest amal 28 tysiač pradali tolki 16 834.
• MAZ vypuściŭ 5010 hruzavikoŭ pry płanie ŭ 6966.
• BMZ płanavaŭ ekspartavać 240 tysiač ton prakatu na rynki «dalniaj duhi», a realna atrymałasia tolki 35 tysiač.

U dakumientach taksama nazyvajucca pradpryjemstvy, jakija pracujuć sa stratami:

• «Amkador»;
• «Homsielmaš»;
• «Babrujskahramaš»;
• stankabudaŭničy zavod imia Kirava;
• «Atłant»;
• «Biełdžy».

Minpram adznačaje, što ŭ mnohich zavodaŭ rezka pavialičylisia zapasy hatovaj pradukcyi — u tym liku ŭ MTZ, MAZa, «Biełkamunmaša», «Atłanta», «Homsielmaša» i inšych. Heta śviedčyć pra pieravytvorčaść i ciažkaści z realizacyjaj.

Takim čynam, dakumienty pakazvajuć maštab sistemnych prablem u biełaruskaj pramysłovaści i śviedčać pra žorstkaje reahavańnie ŭładaŭ na nievykanańnie płanaŭ.

Kamientary da artykuła