Biełarusy vyviešvajuć u internet rekvizity svaich bankaŭskich kartak — usio heta pad šyldaj kaladnaj hulni

Hulnia ŭ tajemnaha Santu — daŭno viadomaja zabava: pierad Kaladami ludzi abmieńvajucca padarunkami, nie kažučy, ad kaho jany. Ciapier staruju hulniu padchapili ŭ Threads, ale jaje daloka nie ŭsie razumiejuć.

Fota: pickpik.com

Trend, pra jaki idzie havorka, zachapiŭ taksama Rasiju i Kazachstan, ale i biełarusy aktyŭna ŭ im udzielničajuć. Ideja ŭ tym, kab napisać u Threads post z numaram svajoj kartki abo pakinuć hety numar u kamientarach da anałahičnych dopisaŭ. Paralelna z hetym, kali chočaš paŭdzielničać, treba pieravodzić hrošy na kartku inšym udzielnikam.

Ciapier u Threads sotni takich paviedamleńniaŭ. Karystalniki nie tolki pakidajuć numar kartki, ale i dajuć nievialičkija tłumačeńni taho, jakija kaladnyja padarunki jany sabie nabuduć na pieraviedzienyja hrošy:

«Chočacca navahodniaha cudu. Mo tut paradujuć, tamu što bolš niama kamu».

«Ja prosta stamiłasia być mašynaj, chočacca dziaŭčyncy 33 hadoŭ pavieryć u cud».

«Sabačku na apieracyju».

«Na jełačku pad stol. Chaču zładzić svajoj małoj navahodni cud».

«Babula ŭ dekrecie, chaču paradavać svajho dvuchhadovaha ŭnučka».

Byli i zakliki ad ludziej, jakim patrebny nie prosta padarunak, a sapraŭdnaja finansavaja dapamoha. Naprykład, prasili skinuć hrošaj, kab možna było nabyć pradukty na Kalady. Svoj kamientar pakinuła maci-adzinočka, jakaja piać hadoŭ vychoŭvaje syna biez baćki. Ciapier małomu 7 hadoŭ, i jon prasiŭ u Dzieda Maroza tatu i kampjutar — žančyna paprasiła dapamahčy z hrošami na apošniaje.

Miarkujučy z kamientaroŭ, niekatoryja ŭdzielniki sapraŭdy pieravodziać hrošy inšym. Ale, što nie dziva, bolšaść ludziej bolš nastrojenaja atrymlivać pieravody, a nie sprabavać siabie ŭ roli tajemnych Santaŭ.

Nie ŭsim, adnak, padabajecca takaja zabava. Adzin z karystalnikaŭ tvitara raskrytykavaŭ akcyju:

«Ludzi ŭ Biełarusi masava źjechali z hłuzdu i źlivajuć svaje asabistyja danyja. Jak imi skarystajucca machlary, my chutka daviedajemsia. Kali łaska, raspaviadzicie blizkim, kab nie vieryli ŭ hetyja cudy».

Nasamreč niemahčyma atrymać dostup da srodkaŭ na kartcy, majučy tolki jaje numar. Dla hetaha patrebnaja i inšaja infarmacyja, jakaja jość na advarotnym baku kartki — naprykład, jaje termin dziejańnia i CVC/CVV kod. Ale ŭsio roŭna varta być abačlivymi i nie pakidać u adkrytym dostupie navat častku infarmacyi, jakaja moža dapamahčy machlaram vas ašukać.

Kamientary da artykuła