Dyziel złamaŭsia prosta na maršrucie
Ciahnik Rabkor — Babrujsk zatrymlivajecca na dźvie hadziny.
Biełaruskaja čyhunka paviedamlaje, što 7 śniežnia dyziel №6516, jaki ruchaŭsia maršrutam Rabkor — Babrujsk, byŭ spynieny na stancyi Ratmiravičy praz techničnuju niepaładku. Ciahnik adpraviŭsia sa stancyi Rabkor a 13:43.
Biełaruskaja čyhunka zapeŭnivaje, što robić pilnyja zachady dla dastaŭki pasažyraŭ. Dla hetaha sa stancyi Babrujsk na stancyju Ratmiravičy nakiravany dapamožny łakamatyŭ.
Miarkujecca, što ciahnik №6516 prybudzie na kančatkovuju stancyju Babrujsk z zatrymkaj prykładna na 2 hadziny.