Na ŭźbiarežžy PAR imkliva vymirajuć z-za hoładu afrykanskija pinhviny

U Paŭdniovaj Afrycy zahinuli dziasiatki tysiač afrykanskich pinhvinaŭ. Pavodle daśledavańnia, apublikavanaha ŭ časopisie Ostrich: Journal of African Ornithology, asnoŭnymi pryčynami katastrofy stali klimatyčnyja źmieny i praźmierny vyłaŭ sardzinaŭ — asnoŭnaha kormu dla ptušak, piša The Guardian.

Afrykanskija pinhviny. Fota ilustracyjnaje

Na dźviuch hałoŭnych kałonijach na astravach Dasen i Robien z 2004 pa 2012 hod zahinuła bolš za 95% pinhvinaŭ. Bolšaść ź ich pamierli padčas lińki, kali ptuški nie mohuć vychodzić u akijan pa ježu. Niedastatkovaja kolkaść sardzin nie dazvalała im nazapasić nieabchodny tłušč dla taho, kab pieratryvać hety pieryjad.

Z 2004 hoda bijamasa sardzin uzdoŭž zachodniaha ŭźbiarežža PAR składała tolki kala 25% ad raniejšaha maksimumu. Na źnižeńnie papulacyi ryby paŭpłyvali źmianieńnie tempieratury i salonaści vady, što pahoršyła ŭmovy dla nierastu, a taksama stabilna vysokija abjomy vyłavu rybakami. Zahinułyja pinhviny, vierahodna, hinuli ŭ mory i nie viartalisia na bierah, bo vialikaj kolkaści miortvych ptušak nie fiksavałasia.

U 2024 hodzie afrykanskich pinhvinaŭ aficyjna adnieśli da katehoryi vidaŭ, jakija krytyčna źnikajuć, — u dzikaj pryrodzie zastałosia mienš za 10 tysiač par. Padobnyja straty nazirajucca va ŭsich miescach, dzie žyvie hety vid.

Daśledčyki adznačajuć, što situacyju možna palepšyć šlacham ustojlivaha kiravańnia rybnymi resursami: u PAR užo zabaronieny kamiercyjny vyłaŭ sardzin vakoł šaści najbujniejšych kałonij pinhvinaŭ, im robiać štučnyja hniozdy, kantralujuć drapiežnikaŭ, a taksama dapamahajuć paciarpiełym i hałodnym ptuškam. Adnak prablemy nazapašvalisia dziesiacihodździami, i mnohija ekśpierty padkreślivajuć nieabchodnaść nieadkładnych mier, bo niedachop drobnaj ryby pahražaje nie tolki pinhvinam, ale i inšym miascovym vidam.

Kamientary da artykuła