Biełaruś i Ałžyr pryniali darožnuju kartu raźvićcia adnosin
Biełaruś i Ałžyr padpisali sumiesnuju zajavu ab umacavańni siabroŭskich i partniorskich adnosin paśla aficyjnych pieramovaŭ Alaksandra Łukašenki z prezidentam Ałžyra Abdelmadžydam Tebunam. U prysutnaści abodvuch palitykaŭ byŭ padpisany i pakiet dakumientaŭ, hałoŭny ź jakich — darožnaja karta supracoŭnictva na 2026—2027 hady, paviedamlaje BiełTA.
Alaksandr Łukašenka i Abdelmadžyd Tebun. Skrynšot videa
Jak rastłumačyŭ ministr antymanapolnaha rehulavańnia i handlu Artur Karpovič, darožnaja karta nie źmiaščaje kankretnych kantraktaŭ — tolki asnoŭnyja napramki i adkaznych za ich realizacyju, a taksama terminy. Dakumient raźličany na dva hady, bo situacyja ŭ śviecie chutka źmianiajecca i płanavańnie na bolš praciahły pieryjad moža być nieefiektyŭnym.
Karpovič pry hetym adznačyŭ, što ałžyrskija partniory — ludzi ŭschodniaha mientalitetu, i časam pytańni vyrašajucca składana. Nastupnaje pasiadžeńnie mižuradavaj kamisii pryznačanaje na pieršuju pałovu lutaha 2026 hoda ŭ Minsku.
Baki taksama padpisali pahadnieńni ŭ halinie vajskova-techničnaha supracoŭnictva, achovy zdaroŭja žyvioł, navukovych daśledavańniaŭ, technałahičnaha raźvićcia i inavacyj. Na ŭzroŭni viedamstvaŭ zaklučanyja miemarandumy ab uzajemarazumieńni ŭ pravavoj śfiery, sielskaj haspadarcy, pramysłovaści, pradprymalnictvie, inavacyjach i vyšejšaj adukacyi.
Akramia taho, byŭ padpisany miemarandum ab uzajemarazumieńni ŭ śfiery akredytacyi pamiž Biełaruskim dziaržaŭnym centram akredytacyi i anałahičnaj ałžyrskaj arhanizacyjaj ALGERAC.
Čytajcie taksama:
Łukašenka nakiroŭvajecca ŭ Ałžyr
Viktara Łukašenku ŭ Amanie nazvali «śpiecyjalnym pradstaŭnikom prezidenta»
Łukašenka pakazaŭsia ŭ Amanie tolki na čaćviorty dzień vizitu — doma ŭ sułtana. Ź im Viktar i Kola